భజరంగ్ దళ్ నేత కాల్చివేత‌.. న‌గ‌రంలో ఉద్రిక్తత

మ‌ధ్య‌ప్ర‌దేశ్‌లోని ఉజ్జ‌యినిలో భజరంగ్ దళ్ నాయకుడు రాకు చౌదరిని తరుణ్ శర్మ అనే వ్య‌క్తి కాల్చి చంపాడు. బుధవారం మధ్యాహ్నం ఒంటిగంట సమయంలో ఈ ఘటన జరిగింది. హత్య తర్వాత నగరమంతా కలకలం రేగింది. భజరంగ్ దళ్ కార్యకర్తలు నినాదాలు చేశారు. కొన్ని చోట్ల కూల్చివేతలు కూడా చోటుచేసుకున్నాయి. హత్య కేసులో నిందితుడైన తరుణ్ శర్మను పోలీసులు అరెస్ట్ చేశారు. అందిన సమాచారం ప్రకారం.. రాకు చౌదరి బుధవారం మధ్యాహ్నం మహిద్‌పూర్ రోడ్ గీతాశ్రీ గార్డెన్ ఎదురుగా ఉన్న తన కార్యాలయంలో కూర్చున్నాడు. అక్క‌డికి వచ్చిన‌ దుండగుడు చౌదరిపై కాల్పులు జ‌రిపాడు. తీవ్రంగా గాయ‌ప‌డ్డ రాకు చౌదరి పరిస్థితి విషమించడంతో ఆసుపత్రికి త‌ర‌లించారు. అయితే అప్ప‌టికే చౌదరి మృతి చెందినట్లు వైద్యులు ప్రకటించారు.

కొద్దిసేపటికే ఈ వార్త నగరమంతటా వ్యాపించింది. దీంతో.. చాలా మంది వ్యాపారులు స్వ‌చ్చందంగా తమ దుకాణాలను మూసివేశారు. పోలీసులు పలు కోణాల్లో ఈ కేసును దర్యాప్తు చేస్తున్నారు. రాకు చౌదరి ఆస్తి సంబంధిత పనులు చేసేవారు. ఇది కాకుండా రెండేళ్ల క్రితం ఓ కేసులో సాక్షి కూడా ఉన్నాడు. అలాగే తాను ఉండే నాగ్డా జంక్షన్ సున్నితమైన ప్ర‌దేశం కిందకు వస్తుంది. కొన్నేళ్ల క్రితం ఇక్క‌డ‌ హిందుత్వ సంస్థకు చెందిన పెద్ద నాయకుడు భేరులాల్ ట్యాంక్‌పై కాల్పులు జరప‌గా అత‌ను తీవ్రంగా గాయ‌ప‌డ్డాడు. ఆ సమయంలో కూడా నగరంలో ఉద్రిక్త వాతావరణం నెలకొంది. దీంతో రాకు చౌదరి హత్య, ఆ తర్వాత నగరంలో ఉద్రిక్తత నెలకొనడంతో పోలీసులు పలు చోట్ల భారీగా మోహరించారు.