రాష్ట్ర భవిష్యత్తు సురక్షితంగా లేదు.. సీఎం ఆవేదన

రాష్ట్ర భవిష్యత్తు సురక్షితంగా లేదని అస్సాం ముఖ్యమంత్రి హిమంత బిస్వా శర్మ అన్నారు. స్వాతంత్ర్య దినోత్సవం సందర్భంగా ముఖ్యమంత్రి ఇక్కడ త్రివర్ణ పతాకాన్ని ఎగురవేశారు. ఈ సందర్భంగా ఆయన ప్రజలనుద్దేశించి ప్రసంగించారు. రాష్ట్రంలో హిందువులు, ముస్లింల మధ్య జనాభా సమతుల్యత వేగంగా కనుమరుగవుతుంద‌ని అన్నారు. అస్సాంలో జనాభా మార్పుల వల్ల 12-13 జిల్లాల్లో మనం మైనారిటీలుగా ఉన్నందున స్థానికులు రక్షణాత్మకంగా మారారని సీఎం అన్నారు. హిందూ జనాభా 60-65 శాతం నుండి క్రమంగా 50 శాతానికి తగ్గుతోందని అన్నారు. అటువంటి సంక్షోభ సమయంలో నేను జనాభా సమతుల్యతను తిరిగి తీసుకురావడానికి ప్రయత్నిస్తున్నానని అన్నారు.

హిందువులు, ముస్లింలు, ఇతరులందరూ కుటుంబ నియంత్రణకు సంబంధించిన నియమాలను పాటించాలని ముఖ్యమంత్రి హిమంత బిస్వా శర్మ అభ్యర్థించారు. సమాజంలోని ప్రతి వర్గం బహుభార్యత్వం గురించి తెలుసుకోవాల‌న్నారు. 12-13 జిల్లాల్లో మనం మైనారిటీలుగా మారామని ఆయ‌న అన్నారు. బలమైన రాష్ట్ర ప్రభుత్వం లేకపోతే స్థానికులు అడుగడుగునా బెదిరింపులకు గురవుతారు. నేను సూర్యుని కాంతిని కాదు.. స్థానికుల ప్రయోజనాలను కాపాడటానికి నా చివరి శ్వాస వరకు ఆశల కొవ్వొత్తిలా నిలుస్తాను.