ప్రభుత్వ ఉద్యోగాన్ని సొంతం చేసుకున్న అవిభక్త కవలలు

పంజాబ్‌లోని అమృత్‌సర్‌కు చెందిన సోహ్నా, మోహనా అనే కవలలు ప్రభుత్వ ఉద్యోగాన్ని సాధించారు. పంజాబ్ స్టేట్ పవర్ కార్పొరేషన్ లిమిటెడ్ (PSPCL)లో ఉద్యోగం సంపాదించారు. 19 ఏళ్ల కవల పిల్లలు డిసెంబర్ 20న ఉద్యోగంలో చేరారు. తమకు ఈ అవకాశాన్ని కల్పించినందుకు పంజాబ్ ప్రభుత్వానికి కృతజ్ఞతలు తెలుపుతున్నామని సోహ్నా-మోహ్నా తెలిపారు. "మేము ఉద్యోగం వచ్చినందుకు చాలా సంతోషిస్తున్నాము. ఉద్యోగంలోకి డిసెంబర్ 20న చేరాము. ఈ అవకాశం ఇచ్చినందుకు పంజాబ్ ప్రభుత్వానికి, మాకు విద్యాబోధన చేసిన పింగల్వారా సంస్థకు మేము ధన్యవాదాలు తెలియజేస్తున్నాము" అని కవలలు మీడియాకు చెప్పారు.

కవలలు సప్లై కంట్రోల్ రూమ్‌లో పని చేయనున్నారు. "ఇక్కడ ఎలక్ట్రికల్ ఉపకరణాలను చూసుకోవడానికి సోహ్నా-మోహ్నా మాకు సహాయం చేయనున్నారు. పంజాబ్ ప్రభుత్వం వారిని నియమించుకుంది. సోహ్నాకు ఉద్యోగం వచ్చింది. మోహ్నాతో వారికి సహాయం చేస్తాడు. ఈ పనిలో వారికి అనుభవం కూడా ఉంది," అని PSPCL సబ్‌స్టేషన్ జూనియర్ ఇంజనీర్ రవీందర్ కుమార్ తెలిపారు. అవిభక్త కవలలకు ప్రభుత్వ ఉద్యోగం ఇవ్వడం పట్ల పలువురు ఆనందాన్ని వ్యక్తం చేస్తున్నారు.