టేకాఫ్ అయిన 2 గంటల తర్వాత తిరిగొచ్చిన ఎయిరిండియా విమానం.. కార‌ణం ఇదే..!

ఎయిరిండియా విమానం కేరళలోని కాలికట్ నుండి దోహాకు బయలుదేరిన తర్వాత అకస్మాత్తుగా తిరిగి వచ్చింది. విమానాశ్రయం నుంచి టేకాఫ్ అయిన 2 గంటల తర్వాత విమానం మళ్లీ కాలికట్‌లో ల్యాండ్ అయింది. ఎయిర్‌పోర్టు అధికారులు తెలిపిన వివరాల ప్రకారం.. విమానంలో సాంకేతిక లోపం తలెత్తింది.. దీంతో విమానం మధ్యలోనుంచే తిరిగి వచ్చింది.

ఎయిర్ ఇండియా విమానం IX 375 ఈరోజు ఉదయం 9:07 గంటలకు కేరళలోని కాలికట్ నుండి బయలుదేరింది. విమానంలో పైలట్, సిబ్బందితో సహా 188 మంది ఉన్నారు. ఫ్లైట్ సమయంలో విమానంలో కొంత సాంకేతిక లోపం సంభవించింది. దాని కారణంగా పైలట్ తిరిగి రావాలని నిర్ణయించుకున్నాడు. విమానం 2 గంటల తర్వాత 11:12 గంటలకు కాలికట్ విమానాశ్రయంలో దిగింది.

దీనిపై సమాచారం ఇస్తూ కాలికట్ ఎయిర్‌పోర్ట్ అధికారులు.. "విమానం క్యాబిన్ ఏసీలో కొంత సాంకేతిక లోపం ఉంది. ఇది ఎమర్జెన్సీ ల్యాండింగ్ కాదు. సాంకేతిక లోపం కారణంగా విమానాన్ని రిట‌ర్న్‌ తీసుకొచ్చాం."

ముందుజాగ్రత్తగా ఈ విమానాన్ని వెనక్కి పిలిపించినట్లు ఎయిర్ ఇండియా అధికార ప్రతినిధి తెలిపారు. విమానంలోని లోపాన్ని త్వరలోనే సరిచేసి, సమయం పడితే మరో విమానంలో ప్రయాణికులను దోహాకు పంపిస్తామన్నారు. ప్రయాణికులంతా విమానాశ్రయంలో వేచి ఉన్నారు. ప్రయాణికులకు నీరు, భోజన ఏర్పాట్లు కూడా చేశారు.