జమ్మూ కశ్మీర్‌లో కీలక అరెస్టులు.. వారి సమాచారం బయటకొచ్చేనా..?

జమ్మూ కశ్మీర్‌లోని బుద్గాం జిల్లాలో లష్కరే తోయిబా (ఎల్ఈటి)తో సంబంధం ఉన్న ముగ్గురు ఉగ్రవాద సహచరులను పోలీసులు అరెస్టు చేశారు. వారు ఈ ప్రాంతంలో ఉగ్రవాద కార్యకలాపాలకు కుట్ర పన్నుతున్నారని, స్థానికులను ఉగ్రవాదంలో చేరేలా ప్రలోభపెట్టడానికి ప్రయత్నిస్తున్నారని పోలీసులు తెలిపారు. ముజామిల్ అహ్మద్, ఇష్ఫాక్ పండిట్, మునీర్ అహ్మద్‌లుగా గుర్తించిన ఉగ్రవాదులను అరెస్టు చేశారు. వారి వద్ద నుండి పిస్టల్, హ్యాండ్ గ్రెనేడ్‌తో సహా పలు ఆయుధాలు, మందుగుండు సామగ్రిని స్వాధీనం చేసుకున్నారు.

పోలీసులు తెలిపిన వివరాల ప్రకారం, అరెస్టయిన వ్యక్తులు ఆబిద్ ఖయూమ్ లోన్ అనే క్రియాశీల లష్కరే తోయిబా ఉగ్రవాదితో సన్నిహిత సంబంధాలు కలిగి ఉన్నారని తెలుస్తోంది. అతను 2020లో పాకిస్తాన్‌కు పారిపోయి ఆ తర్వాత లష్కరే తోయిబా సంస్థలో చేరాడని తెలుస్తోంది. లోన్ ప్రస్తుతం పాకిస్తాన్ నుండి కార్యకలాపాలు నిర్వహిస్తున్నాడు. బుద్గాం జిల్లాలోని నర్బల్-మాగం ప్రాంతంలో స్థానికులను తీవ్రవాదంలోకి మళ్ళించడం, వారిని ఉగ్రవాద గ్రూపుల్లో చేరేలా ప్రేరేపించడం, ఉగ్రవాద సంబంధిత కార్యకలాపాలను నిర్వహించేలా వారిని నిర్దేశించడంలో పాల్గొంటున్నాడు. అరెస్టు చేసిన ఉగ్రవాద సహచరులు అతని ఆదేశాల మేరకు పనిచేస్తున్నారని, ఆ ప్రాంతంలో ఉగ్రవాద కార్యకలాపాలను అమలు చేయడంతో పాటు, ప్రజలను తీవ్రవాదంలోకి మళ్ళించి ఆకర్షించడానికి ప్రయత్నించే పనిలో ఉన్నారని పోలీసులు తెలిపారు. ఈ విషయంపై తదుపరి దర్యాప్తు జరుగుతోంది.