'వర్చువల్ ర్యాలీ'కి భౌతికంగా హాజరయ్యేందుకు వందలాది మంది మద్దతుదారులు శుక్రవారం పార్టీ కార్యాలయం వద్దకు రావడంతో లక్నో పోలీసులు సమాజ్‌వాదీ పార్టీ నాయకులపై ఎఫ్‌ఐఆర్ నమోదు చేశారు. ర్యాలీలో ఎస్పీ చీఫ్ అఖిలేష్ యాదవ్, బీజేపీ మాజీ నేత స్వామి ప్రసాద్ మౌర్య ప్రసంగించారు. దాదాపు 2,500 మంది సమాజ్ వాదీ పార్టీ నాయకులపై అంటువ్యాధుల చట్టంలోని సంబంధిత సెక్షన్లతో పాటు ఇండియన్ పీనల్ కోడ్ (IPC) సెక్షన్ 188, 269, 270, 341 కింద ఎఫ్‌ఐఆర్ నమోదు చేసినట్లు లక్నో పోలీస్ కమిషనర్ తెలిపారు. దీనికి సంబంధించి ఎఫ్‌ఐఆర్ నమోదు చేయడానికి ముందే వీడియో సాక్ష్యాలను సేకరించినట్లు నగర పోలీసు చీఫ్ తెలిపారు.

కోవిడ్-19 ప్రోటోకాల్‌ను ఉల్లంఘించినందుకు సమాజ్‌వాద్‌ పార్టీ కార్యాలయం వెలుపల గుమిగూడిన జనాలను లక్నో పోలీసులు తొలగిస్తున్నట్లు 'వర్చువల్ ర్యాలీ'లోని దృశ్యాలు చూపించాయి. ఈసీ ఆదేశాలను ఉల్లంఘించి ప్రజలు పెద్ద సంఖ్యలో గుమిగూడిన చోట నగర పోలీసులను మోహరిస్తున్నట్లు లక్నో కమిషనర్ ఆఫ్ పోలీస్ డికె ఠాకూర్ అంతకుముందు రోజు చెప్పారు. "ఎస్పీ కార్యాలయం వెలుపల గుమిగూడుతున్న సమూహాల గురించి మాకు సోషల్ మీడియాలో సమాచారం అందింది. జనాలను తొలగించడానికి పోలీసు సిబ్బందిని పంపాము" అని ఆయన తెలిపారు.

ముందస్తు అనుమతి లేకుండానే సమాజ్‌వాదీ పార్టీ వర్చువల్ ర్యాలీ నిర్వహించారని లక్నో జిల్లా మేజిస్ట్రేట్ అభిషేక్ ప్రకాశ్ తెలిపారు. సమాచారం అందుకున్న పోలీసు బృందాన్ని, మేజిస్ట్రేట్‌ను ఎస్పీ కార్యాలయానికి పంపామని, వారి నివేదిక ఆధారంగా చర్యలు తీసుకుంటామని డీఎం ప్రకాశ్‌ తెలిపారు. సమాజ్‌వాదీ పార్టీ ఉత్తరప్రదేశ్ యూనిట్ చీఫ్ నరేష్ ఉత్తమ్ పటేల్ మాట్లాడుతూ, "ఇది మా పార్టీ కార్యాలయంలో వర్చువల్ ఈవెంట్. మేము ఎవరినీ పిలవలేదు, ప్రజలు వచ్చారు. ప్రజలు కోవిడ్ ప్రోటోకాల్‌లకు కట్టుబడి పని చేస్తారు." అని అన్నారు.

దేశంలోని కొన్ని ప్రాంతాల్లో కోవిడ్-19 కేసుల పెరుగుదల నేపథ్యంలో భౌతిక ర్యాలీలపై నిషేధం విధిస్తున్నట్లు భారత ఎన్నికల సంఘం జనవరి 8న ప్రకటించింది. ఈసీ యొక్క ఆదేశాలు 'వర్చువల్' ర్యాలీలకు వర్తించనప్పటికీ, ఏ పార్టీ అయినా కోవిడ్-19 మార్గదర్శకాలను ఉల్లంఘించినట్లు గుర్తించినట్లయితే ప్రచారం నుండి నిషేధించబడుతుందని కమిషన్ స్పష్టంగా పేర్కొంది. "ఒక అభ్యర్థి లేదా రాజకీయ పార్టీ పైన పేర్కొన్న మార్గదర్శకాలలో దేనినైనా ఉల్లంఘిస్తే, సంబంధిత అభ్యర్థి/పార్టీకి ర్యాలీలు, సమావేశాలు మొదలైన వాటికి తదుపరి అనుమతి ఇవ్వబడదు" అని ఈసీ కోవిడ్ -19 మార్గదర్శకాల్లో చెప్పారు.

శుక్రవారం జరిగిన 'వర్చువల్ ర్యాలీ'లో సమాజ్‌వాదీ పార్టీ అధినేత అఖిలేష్ యాదవ్ తిరుగుబాటు మంత్రులు, బీజేపీ ఎమ్మెల్యేలను పార్టీలో చేర్చుకున్నారు. లక్నోలోని ఎస్పీ కార్యాలయంలో పార్టీ కార్యకర్తలను ఉద్దేశించి అఖిలేష్ యాదవ్ మాట్లాడుతూ.. "బీజేపీలో వికెట్లు పడుతున్నాయి, బాబా (యోగి ఆదిత్యనాథ్)కి క్రికెట్ ఎలా ఆడాలో తెలియదని, ఇప్పుడు అతను క్యాచ్‌ను వదులుకున్నాడు. "మా కూటమి 400 సీట్లు కూడా గెలుచుకోగలదు" అని యూపీ మాజీ పేర్కొన్నారు. బిజెపి నుండి వైదొలగిన స్వామి ప్రసాద్ మౌర్య ఎస్పీలో చేరిన తర్వాత మాట్లాడారు. సమాజ్ వాదీ పార్టీ నేతృత్వంలోని కూటమి బిజెపి అంతిమ చరిత్రను లిఖించబోతోంది అని అన్నారు.

అంజి

నేను గోనె అంజి. న్యూస్‌ మీటర్‌ తెలుగులో సబ్‌ ఎడిటర్‌గా విధులు నిర్వర్తిస్తున్నాను. గతంలో 99టీవీ, మోజో టీవీ, ఐ న్యూస్‌, ప్రైమ్‌ 9 న్యూస్‌ ఛానెళ్లలో న్యూస్‌ కాపీ ఎడిటర్‌గా పని చేశాను. జర్నలిజం పట్ల ఇష్టంతో ఈ వృత్తిని ఎంచుకున్నాను. 2018లో బ్యాచ్‌లర్‌ ఆఫ్‌ ఆర్ట్స్‌ జర్నలిజంలో డిగ్రీ పట్టా పొందాను.

Next Story