ఆ నర్సు మరణశిక్షను 'సుప్రీం' ఆపుతుందా.?
కేరళకు చెందిన నిమిషా ప్రియ అనే నర్సు కేసును విచారించేందుకు సుప్రీంకోర్టు అంగీకరించింది.
By Medi Samrat
కేరళకు చెందిన నిమిషా ప్రియ అనే నర్సు కేసును విచారించేందుకు సుప్రీంకోర్టు అంగీకరించింది. నిమిషాకు యెమెన్‌లో మరణశిక్ష పడింది. మరణశిక్ష తేదీ జూలై 16 కాగా.. ఈ పిటిషన్‌ను జూలై 14న విచారిస్తామని సుప్రీంకోర్టు తెలిపింది.
నిమిషా ప్రాణాలను కాపాడేందుకు భారత ప్రభుత్వం దౌత్య మార్గాలను ఉపయోగించాలని పిటిషన్‌లో డిమాండ్ చేశారు. నిమిషా ప్రియ కేరళలోని పాలక్కాడ్ జిల్లా నివాసి. ఆమె 2017లో తన యెమెన్ వ్యాపార భాగస్వామిని హత్య చేసింద‌ని ఆరోప‌ణ‌లు ఉన్నాయి. దీంతో 2020లో ఆమెకు మరణశిక్ష విధించబడింది. 2023లో ఆమె చివరి అప్పీల్ కూడా తిరస్కరించబడింది. దీంతో ఆమె ఇప్పుడు యెమెన్ రాజధాని సనా జైలులో ఉంది.
షరియా చట్టం ప్రకారం మృతుడి కుటుంబానికి 'బ్లడ్ మనీ' ఇవ్వడం ద్వారా నిమిషాకు క్షమాభిక్ష మార్గాన్ని కనుగొనవచ్చని పిటిషన్‌లో న్యాయవాది సుభాష్ చంద్రన్ కెఆర్ సుప్రీంకోర్టుకు తెలిపారు. మృతుడి కుటుంబం ఈ డబ్బును అంగీకరిస్తే, నిమిషా శిక్షను మినహాయించవచ్చు. వీలైనంత త్వరగా దౌత్యపరమైన చర్యలు తీసుకోవాల్సిన అవసరం ఉందని న్యాయవాది నొక్కి చెప్పారు.
ఈ విషయంలో న్యాయస్థానం అటార్నీ జనరల్ సహాయం కోరింది. పిటిషన్ కాపీని అటార్నీ జనరల్‌కు సమర్పించాలని పిటిషనర్‌ను ఆదేశించింది. ఈ అంశాన్ని 'సేవ్ నిమిష ప్రియ - ఇంటర్నేషనల్ యాక్షన్ కౌన్సిల్' అనే సంస్థ చేపట్టింది. నిమిషాకు న్యాయ సహాయం అందించేందుకు ఈ సంస్థ ప్రయత్నిస్తోంది.
మీడియా నివేదికలను ఉటంకిస్తూ.. నిమిషాను ఉరితీసే తేదీని యెమెన్ పరిపాలన జూలై 16గా నిర్ణయించిందని పిటిషన్ పేర్కొంది. యెమెన్ ప్రభుత్వంతో మాట్లాడి భారత ప్రభుత్వం ఈ శిక్షను ఆపాలని ఈ సంస్థ, నిమిషా కుటుంబం ఆశిస్తుంది. 38 ఏళ్ల నిమిషా జీవితం ఇప్పుడు భారత ప్రభుత్వ దౌత్య ప్రయత్నాలు, సుప్రీంకోర్టు నిర్ణయంపై ఆధారపడి ఉంది.
