భార‌త్‌లో వేగంగా వ్యాప్తి చెందుతోన్న ఓమిక్రాన్.. హెచ్చ‌రిక‌లు జారీచేసిన కేంద్రం..

కరోనావైరస్ కొత్త వేరియంట్ ఓమిక్రాన్ వేగంగా వ్యాప్తి చెందుతోంది. దేశంలోని 11 రాష్ట్రాల్లో ప్ర‌స్తుతం 101 కేసులు ఉన్నాయని ఆరోగ్య మంత్రిత్వ శాఖ శుక్రవారం తెలిపింది. ఈ మేర‌కు 19 జిల్లాలలో COVID-19 కేసులు పెరిగే ప్రమాదం ఎక్కువగా ఉన్నాయని హెచ్చరించింది. థ‌ర్డ్‌ వేవ్ ముప్పు నేఫ‌థ్యంలో ఫేస్ మాస్క్‌ల వాడకం, సామాజిక దూరాన్ని కొనసాగించాల్సిన‌ అవసరాన్ని మంత్రిత్వ శాఖ నొక్కి చెప్పింది. అనవసరమైన ప్రయాణాలను నివారించాలని.. పెద్ద పెద్ద‌ సమూహాలు, సమావేశాలకు దూరంగా ఉండాలని మంత్రిత్వ శాఖ ప్రజలను కోరింది. UKలో ఇప్పటికే 11,000 ఓమిక్రాన్ కేసులు ఉన్నాయని మంత్రిత్వ శాఖ హెచ్చ‌రిక‌లు జారీ చేసింది.

ఢిల్లీలో ఒకే రోజు 10 కొత్త కేసులు నమోదవడంతో Omicron వల్ల కలిగే ప్రమాదాల గురించి మళ్లీ హెచ్చరికలు వచ్చాయి. ప్ర‌స్తుతం ఢిల్లీలో 22 ఓమిక్రాన్ కేసులు ఉన్నాయి. గత 24 గంటల్లో నగరంలో మొత్తం కోవిడ్ కేసులలో ఆందోళనకరమైన స్పైక్ తర్వాత 10 కొత్త కేసులు నమోదయ్యాయి. మహారాష్ట్రలో ఇప్పటివరకు అత్యధికంగా 32 ఓమిక్రాన్ కేసులు నమోదయ్యాయి. రాజస్థాన్ 17తో తదుపరి స్థానంలో ఉండ‌గా.. కర్ణాటక, తెలంగాణలలో ఎనిమిది చొప్పున కేసులు న‌మోద‌య్యాయి. గుజరాత్, కేరళ, తమిళనాడు, బెంగాల్, ఆంధ్రప్రదేశ్ ల‌లో కూడా కొత్త వేరియంట్ కేసులు న‌మోద‌య్యాయి. ఆందోళన కలిగించే విషయం ఏమిటంటే.. మహారాష్ట్రలో నమోదైన ఓమిక్రాన్ కేసుల్లో ఇద్దరు చిన్నపిల్లలు, మూడు సంవత్సరాల బాలుడు, 18 నెలల బాలిక ఉన్నారు.

కేసులు, హాట్‌స్పాట్‌లను గుర్తించే ప్రయత్నంలో నిఘా చర్యలను వేగవంతం చేయాలని కేంద్ర‌ ప్రభుత్వం ఇప్పటికే రాష్ట్రాలను కోరింది. డిసెంబరు 1 నుండి కొత్త ప్రయాణ నియమాలు అమలులోకి వచ్చాయి, 'రిస్క్‌లో' ఉన్న దేశాల నుండి వచ్చే విదేశీయులకు RT-PCR పరీక్షలు తప్పనిసరి చేసింది కేంద్రం. Omicron సంక్ర‌మ‌ణ ఎక్కువ‌గా విదేశీ ప్ర‌యాణాల కార‌ణంగానే అధికంగా ఉంద‌ని భారత కోవిడ్ టాస్క్ ఫోర్స్ చీఫ్ డాక్టర్ వీకే పాల్ అన్నారు. Omicron మొదటిసారిగా గత నెలలో దక్షిణాఫ్రికా లో వెలుగుచూడ‌గా.. అప్పటి నుండి US, ఇజ్రాయెల్, హాంకాంగ్, జపాన్‌తో సహా 77 దేశాలకు విస్త‌రించింది.