ద‌ర్శ‌కుడిగా జ‌బ‌ర్ధ‌స్థ్ 'కిరాక్ ఆర్పీ'

తెలుగు కామెడీ టీవీ షోలు ‘జ‌బ‌ర్ధ‌స్థ్’, ‘అదిరింది’ ద్వారా తెలుగు ప్ర‌జ‌ల‌కి ద‌గ్గ‌రైన న‌టుడు కిరాక్ ఆర్పీ.. ద‌ర్శ‌కుడిగా త‌న అదృష్టాన్ని ప‌రీక్షించుకోనున్నాడు. గ‌త‌ కొన్నాళ్ల నుండి ద‌ర్శ‌కుడిగా మారేందుకు ప్ర‌య‌త్నం చేస్తున్న ఆర్పీ.. ఎట్ట‌కేల‌కు ఓ ప్రాజెక్ట్ అనౌన్స్ చేశాడు.

ప్ర‌ముఖ న‌టులు జేడీ చక్ర‌వ‌ర్తి, ప్ర‌కాశ్ రాజ్, రావు ర‌మేష్ ప్ర‌ధాన పాత్ర‌ల‌లో శ్రీ ప‌ద్మ‌జ పిక్చ‌ర్స్ బ్యాన‌ర్ పై కోవూరు అరుణాచ‌లం నిర్మిస్తున్న చిత్రానికి ఆర్పీ ద‌ర్శ‌క‌త్వం వ‌హించ‌నున్నాడు. ఆదివారం సాయంత్రం ఈ ప్రాజెక్ట్‌కి సంబంధించి పూజా కార్య‌క్ర‌మాలు జ‌ర‌గ‌గా.. కార్య‌క్ర‌మానికి మెగాబ్ర‌ద‌ర్‌ నాగ‌బాబు ముఖ్య అతిథిగా హాజ‌ర‌య్యి.. చిత్ర బృందానికి శుభాకాంక్ష‌లు తెలిపారు.

ఈ సంద‌ర్భంగా ఆర్పీ మాట్లాడుతూ‌.. సస్పెన్స్ థ్రిల్ల‌ర్ నేప‌థ్యంగా ఓ ఇంట్రెస్టింగ్ స్టోరీ కుద‌ర‌డంతో ద‌ర్శ‌కునిగా ఆడియెన్స్ ముందుకి రావ‌డానికి నిశ్చ‌యించుకున్నానని అన్నారు. ఈ సినిమాలో జేడీచ‌క్ర‌వ‌ర్తి కీల‌క పాత్ర పోషించ‌‌డానికి అంగీక‌రించ‌డం చాలా ఆనందంగా ఉందని.. సినిమాలో జే.డి. పాత్ర చాలా విల‌క్ష‌ణంగా ఉంటుందని తెలిపారు. హైద‌రాబాద్, నెల్లూర్ ప‌రిస‌ర ప్రాంతాల్లో షూటింగ్ జ‌రుపుకోనున్న ఈ సినిమాకు.. చరణ్ అర్జున్ సంగీతం సమకూరుస్తున్నారు.