పెళ్ళిసందడి మళ్ళీ మొదలవ్వబోతుందట‌.. ప్ర‌క‌టించిన దర్శకేంద్రుడు

By న్యూస్‌మీటర్ తెలుగు  Published on  9 Oct 2020 1:52 PM GMT
పెళ్ళిసందడి మళ్ళీ మొదలవ్వబోతుందట‌.. ప్ర‌క‌టించిన దర్శకేంద్రుడు

దర్శకేంద్రుడు రాఘవేంద్రరావు దర్శకత్వంలో 1996వ సంవ‌త్స‌రం జ‌న‌వ‌రి 12న రిలీజైన‌ పెళ్ళిసందడి సినిమా అప్ప‌ట్లో ఘనవిజయం సాధించిన విషయం తెలిసిందే. ఈ చిత్రంలో శ్రీకాంత్ హీరోగా, దీప్తి భట్నాగర్, రవళి హీరోయిన్లుగా న‌టించారు. స్వ‌ర‌వాణి కీరవాణి స్వరపరిచిన ఈ చిత్రంలోని పాటలు కూడా మంచి ఆదరణ పొందాయి.

అయితే.. టాలీవుడ్ లో నిన్న‌మొన్న‌టి వ‌ర‌కూ స‌త్తా చాటిన‌ సీనియర్ హీరోలందరితో సినిమాలు తీశారు రాఘవేంద్రరావు. ఈ జనరేషన్ హీరోలతో కూడా కొన్ని సినిమాలు రూపొందించారు. ఈ మధ్య కాస్త విరామం తీసుకున్న దర్శకేంద్రుడు మళ్లీ మెగాఫోన్ పట్టబోతున్నారు. ఈ విషయాన్ని ఆయన తన ట్విట్టర్ ఖాతా ద్వారా అధికారికంగా ప్రకటించారు.



'పెళ్లిసందడి' మళ్ళీ మొదలవ్వబోతుంది.. తారాగణం త్వరలో.. అని ట్వీట్ చేశారు రాఘవేంద్రరావు. దీనికి ఓ వీడియోను కూడా జ‌త‌చేశాడు. ఈ వీడియోలో ఈ కొత్త పెళ్లిసంద‌డికి సంబంధించి సాంకేతిక విభాగాన్ని ప్ర‌క‌టించారు. దీనికి ద‌ర్శ‌కేంద్రుడి ఆస్థాన సంగీత దర్శకుడు ఎం.ఎం. కీరవాణి సంగీతం సమకూర్చుతుండ‌గా.. శివశక్తి దత్తా - చంద్రబోస్ లు సాహిత్యాన్ని అందించనున్నారు. ఈ చిత్రాన్ని ఆర్.కె. ఫిలింస్ మరియు ఆర్కా మీడియా వర్క్స్ బ్యానర్స్ పై మాధవి కోవెలమూడి - శోభు యార్లగడ్డ - ప్రసాద్ దేవినేని కలిసి నిర్మించనున్నారు. త్వరలోనే నటీనటుల వివరాలు తెలియజేస్తామని వీడియోలో ప్రకటించారు.

అయితే.. ఈ పెళ్లిసంద‌డి చిత్రంలో శ్రీకాంత్ త‌న‌యుడు రోష‌న్ హీరోగా న‌టిస్తున్న‌ట్టు వార్త‌లు వ‌స్తున్నాయి. ఈ సినిమా ద్వారా రోష‌న్‌కి లైఫ్ ఇవ్వాల‌ని చూస్తున్న‌ట్లు.. అతి త్వ‌ర‌లోనే దీనికి సంబంధించి అధికారిక ప్ర‌క‌ట‌న రానున్న‌ట్లు గుస‌గులు విన‌ప‌డుతున్నాయి. కాగా, శ్రీకాంత్ తనయుడు రోషన్.. నాగార్జున నిర్మించిన 'నిర్మలా కాన్వెంట్' చిత్రంతో వెండితెర ఎంట్రీ ఇచ్చాడు.

Next Story
Share it