నేడు భారత్-చైనా విదేశాంగ మంత్రుల భేటీ.. ప్రధాన ఎజెండా అదే..!

చైనా విదేశాంగ మంత్రి వాంగ్ యీ తన రెండు రోజుల భారత పర్యటన నిమిత్తం సోమవారం (ఆగస్టు 18) ఢిల్లీకి రానున్నారు. ఆయన విదేశాంగ మంత్రి (ఈఏఎం) ఎస్ జైశంకర్‌తో ముఖ్యమైన ద్వైపాక్షిక సమావేశం నిర్వహించనున్నారు. భారత్-అమెరికా సంబంధాలలో పెరుగుతున్న ఉద్రిక్తత మధ్య వాంగ్ యీ పర్యటన చాలా ముఖ్యమైనదిగా భావిస్తున్నారు. డొనాల్డ్ ట్రంప్ భారతీయ వస్తువులపై సుంకాన్ని 50 శాతానికి రెట్టింపు చేశారు.

వాంగ్ యీ పర్యటన సందర్భంగా.. వివాదాస్పద సరిహద్దు వెంబడి శాశ్వత శాంతి, స్థిరత్వం కోసం తీసుకోవాల్సిన‌ కొత్త చర్యలపై భారత్, చైనాలు చర్చించే అవకాశం ఉంది. ఈ నెలాఖరులో ప్రధాని నరేంద్ర మోదీ చైనాలో పర్యటించనున్న నేపథ్యంలో ఈ పర్యటన ప్రాధాన్యం సంతరించుకుంది. 2020లో జరిగిన గాల్వాన్ వ్యాలీ ఘర్షణ తర్వాత ఇటీవ‌లే ఇరు పొరుగు దేశాలు మైత్రి ప్రయత్నాలు చేస్తున్నాయి. ఈ క్ర‌మంలోనే చైనా విదేశాంగ మంత్రి భార‌త్‌లో పర్యటిస్తున్నారు.

సరిహద్దు సమస్యపై జాతీయ భద్రతా సలహాదారు అజిత్ దోవల్‌తో కొత్త రౌండ్ ప్రత్యేక ప్రతినిధి (SR) చర్చలు జరపడానికి వాంగ్ యి ప్రధానంగా భారతదేశాన్ని సందర్శిస్తున్నారు. వాంగ్, దోవల్ సరిహద్దు స‌మ‌స్య‌ల‌పై చర్చల కోసం నియమించబడిన ప్రత్యేక ప్రతినిధులు.

చైనా విదేశాంగ మంత్రి వాంగ్ యీ సోమవారం సాయంత్రం 4:15 గంటలకు న్యూఢిల్లీ చేరుకుంటారు. సాయంత్రం 6:00 గంటలకు విదేశాంగ మంత్రి జైశంకర్‌తో ద్వైపాక్షిక చర్చలు జరుపుతారు. మంగళవారం ఉదయం 11 గంటలకు ఎన్‌ఎస్‌ఏ దోవల్‌తో ప్రత్యేక ప్రతినిధి (ఎస్‌ఆర్) వాంగ్ యి చర్చలు జరుపుతారు.

ఈ సమావేశాల్లో సరిహద్దు పరిస్థితి, వాణిజ్యం, విమాన సర్వీసుల పునరుద్ధరణ వంటి పలు ప్రధాన అంశాలపై ఇరుపక్షాలు చర్చించే అవకాశం ఉంది. విదేశాంగ మంత్రిత్వ శాఖ ప్రకారం.. చైనా మంత్రి మంగళవారం సాయంత్రం 5:30 గంటలకు ప్రధాని నరేంద్ర మోదీని ఆయన నివాసం 7, లోక్ కళ్యాణ్ మార్గ్‌లో కలుస్తారు.