హైదరాబాద్ అభివృద్ధిపై చర్చకు రావాలని సీఎం రేవంత్‌కు కేటీఆర్ సవాల్

హైదరాబాద్ అభివృద్ధిపై తనతో చర్చకు రావాలని సీఎం రేవంత్ రెడ్డికి బీఆర్ఎస్ వర్కింగ్ ప్రెసిడెంట్ కేటీఆర్ సవాల్ విసిరారు. తెలంగాణ భవన్‌లో కేటీఆర్ మీడియాతో మాట్లాడుతూ..అసెంబ్లీ, సచివాలయం, కమాండ్ కంట్రోల్ సెంటర్, గాంధీ భవన్ ఎక్కడైనా సరే.. రేవంత్‌ తో చర్చకు రెడీ. ముఖ్యమంత్రి రేవంత్ రెడ్డి నిరాశ, నిస్పృహతో ఉన్నారు. జూబ్లీహిల్స్ బైపోల్స్ లో కాంగ్రెస్ ఓటమి ఖాయమని రేవంత్ కు అర్థమైంది. అందుకే నాపై రేవంత్ రెడ్డి వ్యక్తిగత దూషణకు దిగాడు. ఓటమి తప్పదని భావించి.. రేవంత్ రెడ్డి మాట్లాడుతున్నారు. ఆయన కంటే గట్టిగా మాట్లాడగలను‌. రేవంత్ కు సమాధానం చెప్పే సత్తా ఉంది. కానీ కేసీఆర్ సూచనతో‌నే రేవంత్ పై వ్యక్తిగత దూషణకు దిగటం లేదు. బీఆర్ఎస్ హాయాంలో చేసిన పనులను ప్రజలకు చెప్పమని కేసీఆర్ నాకు చెప్పారు. నన్ను వ్యక్తిగతంగా తిట్టినా.. ముఖ్యమంత్రి హోదాలో ఉన్నారు కాబట్టి రేవంత్ ను గౌరవిస్తున్నా. హైదరాబాద్, జూబ్లీహిల్స్ అభివృద్ధిపై రేవంత్ తో చర్చకు రెడీ. .అని కేటీఆర్ ఛాలెంజ్ చేశారు.

హోంశాఖను చూస్తున్న రేవంత్ రెడ్డి హాయాంలో శాంతి భద్రతలు క్షీణించాయి. హైదరాబాద్ లో గన్, డ్రగ్ కల్చర్ పెరిగింది. కాంగ్రెస్ హయాంలో హైదరాబాద్.. చెత్త సిటీ, క్రైం సిటీగా మారింది. అండర్ పాస్‌లు, ప్లైఓవర్లు కేసీఆర్ హయాంలోనే నిర్మించాం. కాంగ్రెస్ వచ్చాక ఎన్ని ఫ్లైఓవర్లు కట్టారో చెప్పాలి. పదేళ్ళల్లో వంద లింకు రోడ్లు నిర్మించాం. కాంగ్రెస్ వచ్చాక ఒక గుంత కూడా పూడ్చలేదు. సీఎం అంటే కటింగ్ మాస్టర్ మాదిరి రేవంత్ వ్యవహరిస్తున్నారు. సిటీలో మళ్ళీ మంచి నీటి కష్టాలు తెచ్చింది కాంగ్రెస్ సర్కార్. చెత్త సమస్య పరిష్కారానికి స్వచ్చ హైదరాబాద్ కార్యక్రమానికి మేము శ్రీకారం చుట్టాం. మెట్రో నిర్మించిన ఎల్ అండ్ టీని రేవంత్ రెడ్డి.. బెదిరించి పంపించారు..అని కేటీఆర్ ఆరోపించారు.