సమంత 'శాకుంతలం' ఓటీటీ రిలీజ్ ఫిక్స్‌

ఇటీవలి కాలంలో ఎన్నో అంచనాలతో విడుదలై డిజాస్టర్ గా నిలిచిన సినిమా 'శాకుంతలం'. పెట్టిన బడ్జెట్ కు.. వచ్చిన కలెక్షన్స్ కు ఏ మాత్రం సంబంధం లేదు. సమంత ప్రధాన పాత్రలో పౌరాణిక కథాంశంతో తెరకెక్కిన ఈ సినిమాకి గుణశేఖర్ దర్శకత్వం వహించారు. కాళిదాసు రచించిన అభిజ్ఞాన శాకుంతలం ఆధారంగా గుణశేఖర్ ఈ సినిమాను తెరకెక్కించారు. ఇందులో శకుంతల పాత్రలో సమంత నటించగా.. దుష్యంతుడిగా దేవ్ మోహన్ కనిపించాడు. మోహన్ బాబు, అనన్య నాగళ్ల, సచిన్ ఖేడ్కర్, గౌతమ్, మధుబాల కీలక పాత్రలను పోషించారు. ఇక ఈ సినిమాను గుణశేఖర్ తనయ నీలిమ గుణతో కలిసి దిల్ రాజు నిర్మించారు. అరవై కోట్ల బడ్జెట్ తో రూపొందిన ఈ సినిమా కనీసం ఇరవై కోట్లు కూడా రాబట్టలేదు.

ఈ సినిమాను త్వరలోనే ఓటీటీలో విడుదల చేయనున్నారు. మే 12న ఈ సినిమా అమెజాన్ ప్రైమ్ ఓటీటీలో రిలీజ్ కానుంది. దాదాపు 20 కోట్ల‌కు ఈ సినిమా ఓటీటీ హ‌క్కుల‌ను అమెజాన్ ప్రైమ్ సొంతం చేసుకున్న‌ట్లు స‌మాచారం. ఈ సినిమాను థియేటర్లలో చూడని వాళ్లు.. ఓటీటీలో చూసే అవకాశం ఎక్కువగానే ఉంది. సమంతకు ఉన్న ఫాలోయింగ్ దృష్ట్యా ఓటీటీలో బాగానే వ్యూస్ రావచ్చు.