చిత్ర‌సీమ‌లో విషాదం.. ప్ర‌ముఖ నిర్మాత క‌న్నుమూత‌

ప్రముఖ కన్నడ నిర్మాత అనేకల్ బాల్‌రాజ్ ఆదివారం నాడు కుమారస్వామి లేఅవుట్ పోలీస్ స్టేషన్ పరిధిలోని గౌరవ్‌నగర్‌లో రోడ్డు ప్రమాదంలో మరణించారు. ఆయన వయసు 58 సంవత్సరాలు. వాకింగ్ పూర్తయిన తర్వాత నిర్మాత ఇంటికి వెళ్తుండగా రోడ్డు ప్రమాదం జరిగింది. ఏటీఎం వద్దకు వెళ్లేందుకు రోడ్డు దాటేందుకు ప్రయత్నించగా ఓ బైక్‌ ఢీకొట్టడంతో కిందపడ్డాడు. ఆ సమయంలో తలకు బలమైన గాయాలు కావడంతో సమీపంలోని ఆసుపత్రికి తరలించారు. రెండు గంటల తర్వాత ఆస్పత్రిలో తుది శ్వాస విడిచారు. కుమారస్వామి లేఅవుట్ పోలీసులు పరారీలో ఉన్న బైకర్ కోసం గాలిస్తున్నారు.

అనేకల్ బాల్‌రాజ్‌కు 25 ఏళ్లకు పైగా సినీ పరిశ్రమతో అనుబంధం ఉంది. 1999లో రామ్‌కుమార్ నటించిన ఆహా సినిమాతో నిర్మాతగా తన ప్రయాణాన్ని ప్రారంభించాడు. ప్రేమ్ దర్శకత్వం వహించిన ఛాలెంజింగ్ స్టార్ దర్శన్ 'కరియా' సినిమా ఒక మైలురాయిగా నిలిచింది. కరియా శాండల్‌వుడ్‌లో దర్శన్, ప్రేమ్‌లకు గుర్తింపునిచ్చింది. ఆ తర్వాత సమీర్ దత్తాని జాక్‌పాట్, కెంప, జన్మ, గణప చిత్రాలను నిర్మించారు. నటుడు దర్శన్ ట్విట్టర్‌లో సంతాపం తెలిపారు. 'ఆయన కుటుంబానికి తీరని లోటును తీర్చే శక్తిని ఆ భగవంతుడు ప్రసాదించాలని కోరుకుంటున్నా' అని ట్వీట్‌లో పేర్కొన్నారు. దర్శకుడు ప్రేమ్‌ మృతి పట్ల తన ఇన్‌స్టాగ్రామ్‌ ఖాతాలో సంతాపం తెలిపారు. పలువురు చిత్ర పరిశ్రమకు చెందిన ప్రముఖులు ఆయన ఆత్మకు శాంతి కలగాలని కోరుతూ ఉన్నారు.