'అల్లు అర్హ' వెండితెర ఎంట్రీ.. గర్వంగా ఉందన్న అల్లు అర్జున్

టాలీవుడ్‌ భారీ చిత్రాల ద‌ర్శ‌కుడు గుణశేఖర్ దర్శకత్వంలో 'శాకుంతలం' సినిమా రూపొందుతున్న సంగ‌తి తెలిసిందే. ఈ సినిమాలో సమంత ప్రధానపాత్ర పోషిస్తోన్న విష‌యం కూడా తెలిసిందే. అయితే ఈ సినిమాలో ఇండ‌స్ట్రికి చెందిన‌ ప్ర‌ముఖ కుటుంబం నుండి మ‌రో వార‌సురాలు ప‌రిచ‌య‌మ‌వ‌బోతుంది. ఐకాన్ స్టార్ అల్లు అర్జున్ కుమార్తె అర్హ కూడా ఈ సినిమాలో నటిస్తోంది. ఈ విషయాన్ని స్వ‌యంగా అల్లు అర్జున్ సోషల్ మీడియా ద్వారా అభిమానుల‌తో పంచుకున్నారు. ఈ సంద‌ర్భంగా అల్లు కుటుంబం నుంచి నాలుగో తరం సినిమాల్లోకి ఎంట్రీ ఇస్తుండడం పట్ల గర్వంగా ఉందని అల్లు అర్జున్ ట్వీట్ చేశారు.

అల్లు అర్హ 'శాకుంతలం' మూవీ ద్వారా సినిమా రంగంలో ప్రవేశిస్తోందని ట్వీట్‌లో రాసుకొచ్చారు. ఈ సంద‌ర్భంగా దర్శకుడు గుణశేఖర్, నీలిమ గుణలకు అల్లు అర్జున్‌ కృతజ్ఞతలు తెలియ‌జేశారు. ఇక ఈ సినిమాలో అల్లు అర్హ చిన్ననాటి భరతుడిగా కనిపించనుంది. శకుంతల, దుష్యంతుల కుమారుడే భరతుడు. శకుంతల, దుష్యంతుడి ప్రేమకావ్యాన్ని గుణశేఖర్ 'శాకుంతలం' చిత్ర ఇతివృత్తంగా తీసుకున్నారు. ఇందులో దుష్యంతుడిగా కేరళ యాక్టర్ దేవ్ మోహన్ నటిస్తుండ‌గా.. మణిశర్మ సంగీతం అందిస్తున్నారు.