వన్ సైడ్ లవ్.. మైన‌ర్‌ను చంపి.. ఆ త‌ర్వాత ఏం చేశాడంటే..

జార్ఖండ్‌లోని గర్వా నగరానికి దగ్గరగా ఉన్న ఒక గ్రామంలో వన్ సైడ్ లవ్ కారణంగా.. మైనర్ బాలికపై కాల్పులు జరిపిన తర్వాత, ఒక వ్యక్తి రైలు కింద పడి ఆత్మహత్య చేసుకున్నాడు. బుధవారం బాలిక మృతదేహానికి అంత్యక్రియలు జరుపుతున్న సమయంలో ఆమెను కాల్చిన వ్యక్తి రైలు కింద దూకి ఆత్మహత్యకు పాల్పడ్డాడు. ఆత్మహత్యకు ముందు అతడు తన కుటుంబ సభ్యులకు రెండు పేజీల సూసైడ్ నోట్‌ను ఉంచాడు. కరివాడిహ్ గ్రామంలో మధ్యాహ్నం 12 గంటల సమయంలో పాఠశాల నుండి ఇంటికి తిరిగి వస్తున్న తొమ్మిదో తరగతి విద్యార్థిని, ఒక పిచ్చి ప్రేమికుడు ఆపి కాల్చి చంపాడు. అంతకుముందు బాలికపై కత్తితో దాడి చేశాడు. ఈ దాడిలో అతని చేతికి గాయమైంది. ఆ తర్వాత, నేరస్థుడు తన జేబులోంచి కంట్రీ మేడ్ పిస్టల్‌ని తీసి బాలిక ఛాతీపై రెండు బుల్లెట్లు కాల్చాడు. దీంతో బాలిక అక్కడికక్కడే మృతి చెందింది.

బాలికపై పిస్టల్ విసిరి నేరస్థుడు అక్కడి నుంచి పారిపోయాడు. ఈ విషయంపై ఫిర్యాదు అందుకున్న పోలీసులు సంఘటనా స్థలానికి చేరుకున్నారు. బాలిక మృతదేహానికి పోస్టుమార్టం అనంతరం పోలీసులు మృతదేహాన్ని బుధవారం కుటుంబ సభ్యులకు అప్పగించారు. అనంతరం కుటుంబసభ్యులు, గ్రామ ప్రజలు బాలిక మృతదేహాన్ని మధ్యాహ్నం 3 గంటల సమయంలో కచర్వ తోల శ్మశాన వాటికలో ఖననం చేశారు. కాసేపటి తర్వాత బాలికను హత్య చేసిన ఇంతియాజ్ అన్సారీ రైలు ముందు దూకి ఆత్మహత్య చేసుకున్నాడని తెలిసింది. ఘటనా స్థలానికి చేరుకున్న పోలీసులు ప్రియుడి మృతదేహాన్ని స్వాధీనం చేసుకున్నారు. గురువారం బాలుడి కుటుంబ సభ్యులకు మృతదేహాన్ని అప్పగించారు. ఇంతియాజ్ కుటుంబ సభ్యులు గురువారం నాడు అదే శ్మశానవాటికలో అతడిని ఖననం చేశారు. కేవలం 24 గంటల వ్యవధిలో ఈ ఘటనలు చోటు చేసుకున్నాయి.