బర్త్ డే సెల‌బ్రేష‌న్స్ పేరిట‌ హోటల్ లో రూమ్ తీసుకున్న జంట.. ఆ తర్వాత షాకింగ్ ఘ‌ట‌న‌

ఫరీదాబాద్ : హర్యానాలోని ఫరీదాబాద్‌లో ఓ ప్రేమ జంట తమ పుట్టినరోజు వేడుకల పేరిట ఓ హోటల్‌లో గదిని బుక్ చేసుకున్నారు. అయితే.. ఆ తర్వాత ప్రియురాలి గొంతుపై ప్రేమికుడు పదునైన ఆయుధంతో దాడి చేశాడు. ఈ ఘటన తర్వాత ప్రేమికుడు హాయిగా హోటల్ నుంచి తప్పించుకోగా.. గాయపడిన యువతిని పోలీసులు చికిత్స నిమిత్తం ఆస్పత్రికి తరలించారు. ఈ కేసు ఫరీదాబాద్‌లోని ఎన్‌ఐటీ నంబర్‌ 5 ప్రాంతంలో జరిగింది. ఆ ప్రాంతంలోని ఓ హోటల్‌కు ప్రేమికులు వచ్చినట్లు తెలుస్తోంది.

ఈ జంట పుట్టినరోజు వేడుకల పేరుతో హోటల్‌లో గదిని బుక్ చేసుకున్నారు. ఆ వ్యక్తి కొద్దిసేపటికే గదిని వదిలి వెళ్లిపోయాడు. కొద్దిసేపటికి, రక్తంతో తడిసిన యువతి కూడా తన గది నుండి బయటకు వచ్చింది. గాయపడిన యువతిని చూసిన హోటల్ సిబ్బంది వెంటనే పోలీసులకు సమాచారం అందించారు. గాయపడిన బాలికను పోలీసులు ఆస్పత్రికి తరలించి చికిత్స అందిస్తున్నారు. నిందితుడు పరారీలో ఉన్నట్లు సమాచారం. పోలీసులు కేసు దర్యాప్తు చేస్తున్నారు.

హోటల్ మేనేజర్ సునీల్ తెలిపిన వివరాల ప్రకారం.. యువకుడు, యువతి ఇద్దరూ మేజర్లే. తనతో పాటు వచ్చిన అమ్మాయి పుట్టినరోజు అని చెప్పి ఆ యువకుడు రూమ్ బుక్ చేసుకున్నాడని హోటల్ మేనేజర్ తెలిపారు. కాసేపటికి ఆ యువకుడు వెళ్లిపోగా.. కొద్ది సేపటికి గొంతు నుంచి రక్తం కారుతూ ఆమె బయటకు వచ్చింది. అయితే మనస్పర్థల కారణంగా హోటల్ రూమ్ లో ఏదైనా ఘటన చోటు చేసుకుందా అనే అనుమానాలు వస్తున్నాయి. దీనికి సంబంధించిన మరింత సమాచారం తెలియాల్సి ఉంది.