ప్రపంచ వ్యాప్తంగా కరోనా మహమ్మారి పట్టిపీడిస్తోంది. కరోనా వైరస్‌ పుట్టిన నాటి నుంచి వ్యాక్సిన్‌ను కనిపెట్టేందుకు పరిశోధకులు ఎంతో కృషి చేస్తున్నారు. ఈ వైరస్‌ వల్ల ఇప్పటికే ఎంతో మంది ప్రాణాలు విడిచారు. లక్షల్లో ఆస్పత్రుల్లో చికిత్స పొందుతున్నారు. చైనాలో పుట్టిన ఈ వైరస్‌ దాదాపు 200లకుపైగా దేశాలకు పాకింది. ఇక భారతదేశంలో కూడా రోజురోజుకు విజృంభిస్తోంది. ఈ వైరస్‌కు వ్యాక్సిన్‌ ఎప్పుడు వస్తుందోనని ప్రపంచమంతా ఎదురు చూస్తున్నారు. ఈ వ్యాక్సిన్‌ తయారీలో ఎన్నో దేశాలు తలమునకలవుతున్నాయి.

ఈ నేపథ్యంలో ప్రపంచ ఆరోగ్య సంస్థ (డబ్ల్యూహెచ్‌వో) ఓ శుభవార్త చెప్పింది. ప్రపంచ వ్యాప్తంగా ప్రస్తుతం దాదాపు 70 కరోనా వ్యాక్సిన్ల తయారీ వివిధ దశల్లో ఉన్నాయని, ఇక మూడు వ్యాక్సిన్లు మనుషులపై ప్రయోగించడానికి సిద్ధంగా ఉన్నాయని తెలిపింది. కాగా, ఈ వ్యాక్సిన్‌ ఇప్పటికే కోతులు, ఎలుకలపై ప్రయోగాలు నిర్వహించారని, మొదటిదశ వ్యాక్సిన్‌ ప్రయోగాలు విజయవంతం అయ్యాయని చైనా శాస్త్రవేత్తలు తెలిపారు.ఈ ప్రయోగాల్లో జంతువుల శరీరాల్లో సార్స్‌ -కోవ్‌-2 యాంటీ బాడీస్‌ను ఉత్పత్తి అయినట్లు గుర్తించినట్లు తెలుస్తోంది.

కోతులకు మొదటి డోస్‌ కింద మూడు మైక్రో గ్రాములు, రెండో డెస్‌ కింద ఆరు మైక్రో గ్రాముల చొప్పున వ్యాక్సిన్‌ ఇవ్వడం ద్వారా విజయవంతం అయ్యిందని, త్వరలోనే ఈ వ్యాక్సిన్‌ మనుషులపై ప్రయోగించి అందుబాటులో రానుందని శాస్త్రవేత్తలు చెబుతున్నారు. అయితే కరోనా కోసం తయారు చేసిన ఈ వ్యాక్సిన్‌ దాదాపు పది రకాల వైరస్‌లను నాశనం చేస్తుందని శాస్త్రవేత్తల అద్యయనంలో గుర్తించారు.

సుభాష్ గౌడ్

నేను న్యూస్ మీటర్‌లో జర్నలిస్టుగా పని చేస్తున్నాను. గతంలో రిపోర్టర్‌గా, కంటెంట్ రైటర్‌, సబ్ ఎడిటర్‌గా భారత్‌ టుడే న్యూస్‌ ఛానల్‌, సూర్య, ఆంధ్రప్రభ, న్యూస్‌హబ్‌, ఏపీ హెరాల్డ్‌లలో పని చేశాను. జర్నలిజం పట్ల ఇష్టంతో నేను ఈ మార్గాన్ని ఎంచుకున్నాను.