అమర్‌నాథ్ యాత్ర : 84 మంది ఏపీ యాత్రికులు క్షేమం.. మ‌రో ఇద్ద‌రు మాత్రం..

ఆంధ్రప్రదేశ్‌లోని వివిధ ప్రాంతాల నుంచి అమర్‌నాథ్ యాత్రకు వెళ్లిన సుమారు 84 మంది యాత్రికులు సురక్షితంగా ఉన్నారని తెలిసింది. ఆదివారం మధ్యాహ్నం నాటికి ఇద్దరు మహిళలు మాత్రమే ఆచూకీ తెలియరాలేదని అధికారిక వర్గాలు తెలిపాయి. తొలుత ఐదుగురు యాత్రికులు గల్లంతయ్యారని, ఆ తర్వాత ముగ్గురిని గుర్తించి క్షేమంగా ఉన్నట్లు రాష్ట్ర ప్రభుత్వం తెలిపింది. రాష్ట్ర ప్రభుత్వ అధికారులు యాత్రికులతో, వారి కుటుంబ సభ్యులతో సంప్రదింపులు జరిపారు.

పవిత్ర పుణ్యక్షేత్రం సమీపంలో వరదల నేప‌థ్యంలో పర్యాటకులు సురక్షితంగా ఉన్నారని ధృవీకరించారు. ప్రభుత్వ వర్గాలు అందించిన సమాచారం ప్రకారం.. రాజమహేంద్రవరం నుండి అమర్‌నాథ్‌కు వెళ్లిన 20 మంది సభ్యుల బృందంలో కేవలం ఇద్దరు మహిళలు మాత్రమే జాడ తెలియలేదు. వారి భర్తలు శ్రీనగర్‌కు తిరిగి వచ్చారు, కాని మహిళలు ఇంకా కనిపించలేదు. వారు గాయపడి ఉండవచ్చు లేదా వేరే ప్రదేశానికి చేరుకుని ఉండవచ్చు. వారి జాడ కోసం మేము సెర్చ్ ఆపరేషన్ నిర్వహిస్తున్నాము, "అని రెస్క్యూ మిషన్‌లో పాల్గొన్న సీనియర్ అధికారి పిటిఐకి తెలిపారు. స్థానిక రెవెన్యూ డివిజనల్ అధికారి ఆదివారం రాజమహేంద్రవరంలో ఇద్దరు మహిళల బంధువులను పరామర్శించి పరిస్థితిని చర్చించారు.

గుంటూరు నుంచి 38 మంది బృందం, తాడేపల్లిగూడెం నుంచి 17 మంది బృందం, తిరుపతి నుంచి ఆరుగురు సభ్యుల బృందం, విజయనగరం నుంచి వచ్చిన మరో యాత్రికుడు కూడా సురక్షితంగా ఉన్నట్లు సమాచారం. కడప జిల్లాలోని రాజంపేటకు చెందిన కొంతమంది యాత్రికులు కూడా సురక్షితంగా ఉన్నట్లు నివేదించబడింది, అయితే వారి సంఖ్య స్పష్టంగా లేదని ప్రభుత్వ గణాంకాలు చెబుతున్నాయి. రాష్ట్రంలోని యాత్రికులకు అవసరమైన సహాయాన్ని అందించడానికి ఏపీ ప్రభుత్వం 1902 అనే ప్రత్యేక హెల్ప్‌లైన్ నంబర్‌ను ప్రారంభించింది. యాత్రికులు, వారి బంధువులకు సహాయం కోసం ఢిల్లీలోని ఏపీ భవన్‌లో హెల్ప్‌లైన్‌లనుఏర్పాటు చేసింది.