ఏపీలో భారీ వర్షాలు కురిసే అవకాశం

విశాఖపట్నం: కోస్తాంధ్రలో ఒకటి రెండు చోట్ల భారీ వర్షాలు కురిసే అవకాశం ఉండగా, రాగల 24 గంటల్లో దక్షిణ, ఉత్తర కోస్తా ఆంధ్రప్రదేశ్‌లో చాలా చోట్ల తేలికపాటి వర్షాలు, ఉరుములు, మెరుపులతో కూడిన వర్షాలు కురిసే అవకాశం ఉంది. దక్షిణ కోస్తాలోని ప్రకాశం, నెల్లూరు, తిరుపతి జిల్లాల్లో అక్కడక్కడా భారీ వర్షాలు పడతాయని.. రాయలసీమలోని చిత్తూరు, వైఎస్ఆర్ జిల్లా, అన్నమయ్య జిల్లాలలోనూ భారీ వానలు కురుస్తాయని చెప్పింది. భారత వాతావరణ శాఖ ప్రకారం.. నైరుతి, దానిని ఆనుకుని ఉన్న ఆగ్నేయ బంగాళాఖాతంలో ఏర్పడిన అల్పపీడనం గత 6 గంటల్లో నైరుతి బంగాళాఖాతం మీదుగా 12 కి.మీ వేగంతో ఉత్తర-వాయువ్య దిశగా కదిలింది.

ఇది నవంబర్ 22 తెల్లవారుజాము వరకు తన అల్పపీడనం యొక్క తీవ్రతను కొనసాగించి, వాయువ్య దిశగా నెమ్మదిగా కదిలే అవకాశం ఉంది. ఆ తర్వాత నవంబర్ 22న దక్షిణ ఆంధ్రప్రదేశ్, ఉత్తర తమిళనాడు-పుదుచ్చేరి తీరం వైపు కదులుతున్న సమయంలో పశ్చిమ వాయువ్య దిశగా పయనించి క్రమంగా బలహీనపడి అల్పపీడనంగా మారే అవకాశం ఉంది. దీని ప్రభావంతో నైరుతి ఆనుకుని ఉన్న పశ్చిమ మధ్య బంగాళాఖాతం, ఆంధ్రప్రదేశ్, తమిళనాడు, పుదుచ్చేరి, శ్రీలంక తీరాల వెంబడి సముద్ర పరిస్థితులు చాలా ఉధృతంగా ఉంటాయి. రానున్న 24 గంటల పాటు మత్స్యకారులు సముద్రంలోకి వెళ్లవద్దని సూచించారు. దక్షిణ కోస్తా, రాయలసీమలో చాలాచోట్ల తేలికపాటి నుంచి మోస్తరు వర్షాలు పడే అవకాశం ఉందని అధికారులు తెలిపారు. ముందస్తు చర్యల కోసం సంబంధిత జిల్లాల యంత్రాంగం అలర్ట్ గా ఉండాలని ఏపీ విపత్తుల నిర్వహణ సంస్థ సూచించింది.

కనిష్ట ఉష్ణోగ్రత తగ్గుదల

ఇదిలా ఉండగా, ఆంధ్రప్రదేశ్‌లోని అనేక ప్రాంతాల్లో కనిష్ట ఉష్ణోగ్రతలు సాధారణం కంటే రెండు నుంచి నాలుగు డిగ్రీల సెల్సియస్‌కు తగ్గే అవకాశం ఉంది. గత ఐదు రోజులుగా, వైజాగ్ ఏజెన్సీలో సింగిల్ డిజిట్‌లో ఉష్ణోగ్రతలు నమోదవుతున్నాయి, అత్యల్పంగా వంజంగిలో 7.1 డిగ్రీల సెల్సియస్ నమోదైంది.