ప్రాజెక్టుల వార్‌పై కేంద్ర ప్రభుత్వం సమక్షంలో తెలుగు రాష్ట్రాల సీఎంల భేటీ

కేంద్ర ప్రభుత్వం సమక్షంలో రెండు తెలుగు రాష్ట్రాల నీటి వ్యవహారాలపై కేంద్రజలశక్తి మంత్రి సీఆర్ పాటిల్ ఆధ్వర్యంలో సమావేశం ప్రారంభమైంది. ఈ సమావేశానికి ఇరు రాష్ట్రాల సీఎంలు హాజరయ్యారు. మొత్తం పది అంశాలతో కూడిన అజెండాను జలశక్తి శాఖ సిద్ధం చేసింది. అందులో తెలంగాణ ప్రభుత్వం 9 అంశాలు, ఏపీ ప్రభుత్వం ఏకైక అజెండాగా ప్రతిపాదించిన పోలవరం-బనకచర్ల అంశాలు ఉన్నాయి.

ప్రస్తుత దశలో పోలవరం-బనకచర్లపై చర్చ అసంబద్ధమంటూ కేంద్ర జలశక్తి కార్యదర్శికి తెలంగాణ ప్రభుత్వ ప్రధాన కార్యదర్శి సీ. రామకృష్ణా రావు తాజాగా లేఖ రాసినప్పటికీ, పోలవరం-బనకచర్ల అనుసంధానమే అజెండాలో మొదటి అంశంగా పెట్టారు. ఆ తర్వాతనే తెలంగాణ ప్రభుత్వం ప్రతిపాదించిన 9 అంశాలున్నాయి. బనకచర్లపై చర్చించేదే లేదని ఇప్పటికే కేంద్రానికి స్పష్టం చేస్తూ రాష్ట్రప్రభుత్వం ఓ లేఖను రాసింది. పెండింగ్ ప్రాజెక్టులకు అనుమతులు, నీటి కేటాయింపులు, ఆర్థిక సాయంపై చర్చించాలని ఆ లేఖలో పేర్కొన్నారు.

ముఖ్యమంత్రుల సమావేశం అజెండాలో తెలంగాణ తరఫున శ్రీశైలం జలాశయంలో వివిధ స్థాయిల ఎత్తు నుంచి నీటిని ఇతర బేసిన్లకు మళ్లించకుండా ఆపడం, కృష్ణా ట్రైబ్యునల్‌ 2 వద్ద తెలంగాణ వాదనలకు ఉమ్మడి రాష్ట్రంలో ప్రారంభించిన తెలంగాణ ప్రాంతంలోని ప్రాజెక్టులకు నీటిని వినియోగించుకునేలా ఆంధ్రప్రదేశ్‌ను ఒప్పించడం వంటి తదితర అంశాలున్నాయి. తుంగభద్ర జలాల మళ్లింపు, రాయలసీమ ఎత్తిపోతల పథకం పనుల విషయంలో నేషనల్​ గ్రీన్​ ట్రైబ్యునల్‌ ఉత్తర్వులకు కట్టుబడి ఉండేలా ఏపీని ఒప్పించడం, శ్రీశైలం కుడిగట్టు కాలువ ప్రవాహ సామర్థ్యాన్ని పెంచకుండా వ్యవహరించడం, శ్రీశైలం నుంచి నీటిని మళ్లిస్తున్న హంద్రీ-నీవా, గురురాఘవేంద్ర, ముచ్చుమర్రి, వెలిగొండ పథకాల నిర్మాణం, విస్తరణలు వద్దని తెలంగాణ ప్రభుత్వ స్పష్టంగా ప్రతిపాదించింది.