సీఎం..స్వీయ నియంత్రణ పాటించలేరా? రేవంత్‌పై సుప్రీంకోర్టు ఫైర్

తెలంగాణలో బీఆర్ఎస్ ఎమ్మెల్యేలు పార్టీ మారిన వ్యవహారంపై దాఖలైన పిటిషన్లపై సుప్రీంకోర్టులో విచారణ జరిగింది.

By Knakam Karthik
Published on : 3 April 2025 1:27 PM IST

Telangana, Cm Revanthreddy, Supreme Court, Assembly Remarks, MLA defections, Brs

సీఎం..స్వీయ నియంత్రణ పాటించలేరా? రేవంత్‌పై సుప్రీంకోర్టు ఫైర్

తెలంగాణలో బీఆర్ఎస్ ఎమ్మెల్యేలు పార్టీ మారిన వ్యవహారంపై దాఖలైన పిటిషన్లపై సుప్రీంకోర్టులో విచారణ జరిగింది. పది మంది ఎమ్మెల్యేలపై దాఖలైన అనర్హత పిటిషన్లపై స్పీకర్ నిర్ణయం తీసుకోకపోవడాన్ని సవాల్ చేస్తూ బీఆర్ఎస్ వర్కింగ్ ప్రెసిడెంట్ కేటీఆర్, ఎమ్మెల్యేలు పాడి కౌశిక్ రెడ్డి, వివేకానంద దాఖలు చేసిన పిటిషన్లపై విచారణ కొనసాగింది. కాగా తెలంగాణ స్పీకర్ సెక్రటరీ తరపున లాయర్ అభిషేక్ మనుసింఘ్వీ వాదనలు వినిపించారు. కౌశిక్ రెడ్డి తరపు ఆర్యామ సుందరం వాదించారు. తర్వాత ఇరుపక్షాల వాదనలు ముగించిన న్యాయస్థానం తీర్పును రిజర్వులో ఉంచింది.

అయితే ఇటీవల రాష్ట్ర అసెంబ్లీలో సీఎం రేవంత్ రెడ్డి మాట్లాడిన మాటలను కౌశిక్ రెడ్డి తరపు లాయర్ సుప్రీంకోర్టు ఎదుట ప్రస్తావించారు. ఉప ఎన్నికలు రావు..స్పీకర్ తరపున కూడా చెబుతున్నా.. అంటూ ఆయన వ్యాఖ్యానించారని కోర్టు దృష్టికి తీసుకెళ్లారు. అసెంబ్లీలో మాట్లాడితే ఏ కోర్టు నుంచి అయినా రక్షణ ఉంటుందని అన్నారని కోర్టుకు తెలిపారు. దీనిపై జస్టిస్ గవాయ్ స్పందిస్తూ.. సీఎం కనీసం స్వీయ నియంత్రణ పాటించలేరా? అని ఆగ్రహం వ్యక్తం చేసింది. బాధ్యతాయుతమైన పదవిలో ఉన్న వ్యక్తులు సంయమనంతో వ్యవహరించాలని హితవు పలికింది. కోర్టు విచారణలో ఉన్న అంశంపై వ్యాఖ్యలు చేయొద్దని సూచించింది. గతంలో కూడా ఇలాంటి ఘటనే జరిగింది. ఆ తర్వాత కూడా ఇలాగే వ్యవహరిస్తే ఎలా? " అని న్యాయస్థానం ప్రశ్నించింది.

మరోవైపు అభిషేక్ మనుసింఘ్వీ కలుగజేసుకుని ప్రతిపక్షం నుంచి అంతకుమించిన రెచ్చగొట్టే వ్యాఖ్యలు ఉన్నాయని కోర్టు దృష్టికి తీసుకెళ్లారు. ఇప్పుడు అవన్నీ అప్రస్తుతమని ధర్మాసనం వాటిని పక్కన పెట్టింది. సీఎం మాటలు కోర్టు ధిక్కారం కింద తీసుకోవాల్సి ఉంటుందని జస్టిస్ గవాయ్ అన్నారు. "మేం సంయమనం పాటిస్తున్నాం.. మిగతా రెండు వ్యవస్థలు అదే గౌరవంతో ఉండాలి”అని వ్యాఖ్యానించారు. స్పీకర్‌కు ఫిర్యాదు చేసిన తర్వాత కోర్టులో కేసులతో తీవ్రస్థాయిలో ఒత్తిడి తీసుకురావాలని చూశారని సింఘ్వీ పేర్కొనగా.. సింగిల్ జడ్జి ఇచ్చిన సూచనలను సానుకూలంగా తీసుకుని ఉంటే కేసు ఇక్కడి వరకు వచ్చేది కాదని జస్టిస్ గవాయ్ అన్నారు.

Next Story