Telangana : బీర్ ధరలను 35-40 శాతం పెంచాలని ప్రభుత్వాన్ని కోరుతున్న BAI

యునైటెడ్ బ్రూవరీస్, AB ఇన్‌బెవ్, కార్ల్స్‌బర్గ్ వంటి భారతదేశంలోని అతిపెద్ద బీర్ తయారీదారులకు ప్రాతినిధ్యం వహిస్తున్న బ్రూవర్స్ అసోసియేషన్ ఆఫ్ ఇండియా (BAI) బుధవారం ద్రవ్యోల్బణాన్ని భర్తీ చేయడానికి ఆల్కహాలిక్ పానీయాల ధరలను వెంటనే పెంచాలని తెలంగాణ ప్రభుత్వాన్ని కోరింది.

2019 ధర సమర్పణల ఆధారంగా రాష్ట్రంలోని బీరు సరఫరా కంపెనీలకు ప్రస్తుతం అనుమతించిన బేసిక్ ధరలు ఉన్నాయని.. అప్పటి నుంచి ఉత్పత్తి వ్యయం 35 నుంచి 40 శాతం పెరిగిందని తెలంగాణ ముఖ్యమంత్రి రేవంత్ రెడ్డికి రాసిన లేఖలో బీఏఐ డైరెక్టర్ జనరల్ వినోద్ గిరి పేర్కొన్నారు.

అయితే.. ఉత్పత్తి వ్యయాల పెరుగుదలను ప్రతిబింబించేలా ధరల సవరణను ప్రభుత్వం ఆమోదించలేదు. ఫలితంగా తెలంగాణలో కార్యకలాపాలు వాణిజ్యపరంగా నిలకడలేని స్థితికి చేరుకున్నాయని.. భవిష్యత్తులో పెట్టుబడులు పెట్టలేని పరిస్థితి నెలకొందని గిరి అన్నారు.

"అసోసియేషన్‌గా, మేము వ్యక్తిగత కంపెనీల గురించి లేదా వాటి నిర్దిష్ట ఉత్పత్తి, ధరల గురించి మాట్లాడలేము, ఉత్పత్తి ఖర్చుల పెరుగుదలను భర్తీ చేయడానికి సగటున 35-40 శాతం పెరుగుదల అవసరమని మేము నమ్ముతున్నాము" అని గిరి లేఖలో పేర్కొన్నారు.

ప్రస్తుతం తెలంగాణలో బీరుకు ప్రకటించిన ధర పొరుగు రాష్ట్రాల కంటే 30-50 శాతం తక్కువగా ఉండడంతో గిట్టుబాటు కావడం లేదు. రాష్ట్రానికి బీరు సరఫరా చేయడంలో కంపెనీలు నష్టపోతున్నాయని ఆయన అన్నారు.

సరఫరాదారుల ధరలను పెంచాల్సిన తక్షణ అవసరాన్ని గుర్తించి.. ప్రభుత్వం జూలై 2024లో ప్రైస్ ఫిక్సేషన్ కమిటీ (పిఎఫ్‌సి)ని ఏర్పాటు చేసింది. రాష్ట్రంలోని అన్ని బీర్ కంపెనీలను సవరించిన డిక్లేర్డ్ ధరల కోసం ప్రతిపాదనలు సమర్పించాలని ఆదేశించింది. రాష్ట్రంలో బీర్ ధరలను ప్రభావితం చేసే ఉత్పత్తి వ్యయం, ఇతర అంశాలపై పరిశ్రమ దృక్పథాన్ని ప్రదర్శించాలని ప్రభుత్వం BAIని కోరింది.

BAI ప్రకారం.. సమర్పణ ప్రక్రియ, ప్రెజెంటేషన్‌లు, పరిశ్రమ సంప్రదింపులు ఆగస్టు 2024 మొదటి వారంలో ముగిశాయి. అయితే ఆ తర్వాత ఎటువంటి పురోగతి లేదు. టోకు ధరల సూచిక (WPI) వంటి నమ్మకమైన బెంచ్‌మార్క్‌ని ఉపయోగించి ప్రభుత్వం కనీసం బీర్ ధరలను ద్రవ్యోల్బణానికి అనుసంధానించాలని.. మునుపటి సంవత్సరం నుండి WPIలో మార్పు ఆధారంగా ప్రతి సంవత్సరం స్వయంచాలకంగా ధరల పెరుగుదలను కంపెనీలను అనుమతించాలని BAI సూచించింది.