అప్పుడు హామీ ఇచ్చినందుకు.. ఇప్పుడు తెలంగాణ సీఎంకు లెటర్లు

అసెంబ్లీ ఎన్నికల ప్రచారంలో కాంగ్రెస్ పార్టీ ఇచ్చిన హామీలను ముఖ్యమంత్రి రేవంత్ రెడ్డి అమలు చేయాలని డిమాండ్ చేస్తూ సిద్దిపేటలో రైతులు పోస్టుకార్డు ద్వారా డిమాండ్ చేశారు. సోమవారం పలువురు రైతులు కలిసి పోస్టుకార్డులపై తమ సమస్యలను రాసి.. ముఖ్యమంత్రి జూబ్లీహిల్స్ నివాసానికి పంపారు. సిద్దిపేటలోని పత్తి మార్కెట్‌యార్డులో లింగారెడ్డిపల్లికి చెందిన వరి రైతు కె.శ్రీనివాస్‌రెడ్డి రైతు భరోసా కింద రూ.15వేలు ఆర్థిక సాయంతో పాటు క్వింటాల్‌కు రూ.500 బోనస్‌ను పొడిగించాలని ప్రభుత్వాన్ని కోరారు. రూ.2 లక్షల వరకు రుణాల మాఫీ, రైతు బీమా గురించి కూడా ఆలోచించాలని ప్రభుత్వాన్ని కోరారు.

అకాల వర్షాల వల్ల దెబ్బ తిన్న పంటలకు, నీటి కొరతతో ఎండిపోయిన ప్రతి ఎకరాకు రూ.25 వేలు పరిహారంగా ప్రకటించాలని రైతులు తమ లేఖల్లో ప్రభుత్వాన్ని డిమాండ్ చేశారు. రైతు సంక్షేమం కోసం ప్రభుత్వం పథకాలను అమలు చేయాలని డిమాండ్ చేశారు. రాఘాపూర్, చిన్నకోడూరు తదితర ప్రాంతాలకు చెందిన రైతులు కూడా ఇదే తరహాలో ముఖ్యమంత్రి రేవంత్ రెడ్డికి లేఖలు రాశారు.