బతుకమ్మ పండుగ వేడుకల షెడ్యూల్‌ వచ్చేసింది

తెలంగాణ ప్రభుత్వం బతుకమ్మ వేడుకలను అధికారికంగా నిర్వహిస్తోంది. తాజాగా బతుకమ్మ పండుగ షెడ్యూల్‌ను ప్రభుత్వం ప్రకటించింది. సెప్టెంబర్ 22 నుంచి తెలంగాణలో బతుకమ్మ వేడుకలు జరుగనున్నాయని మంత్రి జూపల్లి కృష్ణారావు ప్రకటించారు. ఈనెల 27న ట్యాంక్‌బండ్‌పై బతుకమ్మ కార్నివాల్, 28న 10 వేల మందితో బతుకమ్మ సంబురాలు, 29న పీపుల్స్ ప్లాజా దగ్గర బతుకమ్మ పోటీలు, ఈనెల 30న బతుకమ్మ పరేడ్ ఉంటుందని జూపల్లి తెలిపారు. తొమ్మిది రోజుల పాటు జరిగే నవరాత్రుల వేడుకలకు అనుగుణంగా 9 రోజుల పాటు 9 రకాల వేడుకలు, ప్రత్యేక కార్యక్రమాలు నిర్వహించేందుకు ఏర్పాట్లు చేయనుంది.

ఈసారి బతుకమ్మ పండుగను తొలిరోజున వరంగల్‌ జిల్లాలోని రామప్ప ఆలయ ప్రాంగణంలో ప్రారంభించాలని ప్రభుత్వం నిర్ణయించింది. తర్వాత రాష్ట్రవ్యాప్తంగా ముఖ్యమైన పర్యాటక ప్రాంతాల్లో ఈ వేడుకలు నిర్వహించేలా ప్రణాళిక సిద్ధం చేశారు. హుస్సేన్‌సాగర్‌లో ‘ఫ్లోటింగ్‌ బతుకమ్మ’ పేరుతో ఒక ప్రత్యేక కార్యక్రమాన్ని నిర్వహించాలని ప్రభుత్వం నిర్ణయించింది.