ఆ విష‌యంలో సిరిసిల్ల జిల్లా దేశానికే ఆదర్శం : కేటీఆర్‌

విద్య, వైద్యం, వ్యవసాయం, నీటిపారుదల, తాగునీరు, విద్యుత్తు, సంక్షేమం తదితర రంగాల్లో ప్రగతి నివేదికలను వచ్చే ఏడాది మార్చిలోగా జిల్లా కలెక్టర్ ఎంపిక చేసిన మండలాల్లో సమావేశాలు నిర్వహించి ప్రజలకు అందించాలని ఐటీ శాఖ మంత్రి కెటి రామారావు అధికారులను ఆదేశించారు. మంగళవారం సిరిసిల్లలో జరిగిన సమీక్షా సమావేశంలో మంత్రి మాట్లాడుతూ.. తెలంగాణ రాష్ట్రం ఏర్పడిన తర్వాత అనేక సంక్షేమ పథకాలు, అభివృద్ధి పనులు జరిగాయన్నారు.

ఇతర ప్రాంతాలతో పోలిస్తే చిన్న జిల్లా అయినప్పటికీ గత ఎనిమిదేళ్లలో రాజన్న-సిరిసిల్ల జిల్లా ఎంతో అభివృద్ధి సాధించింది. విద్య, వైద్యం, వ్యవసాయం, నీటిపారుదల, తాగునీరు, విద్యుత్తు, సంక్షేమం తదితర రంగాల్లో సిరిసిల్ల జిల్లా దేశానికే ఆదర్శంగా నిలుస్తుందన్నారు. ఆయా రంగాల్లో సాధించిన ప్రగతిని ప్రజలకు తెలియజేసేందుకు ఎంపిక చేసిన మండలాల్లో సభలు నిర్వహించి ఒక్కో రంగానికి సంబంధించిన ప్రగతి నివేదికలను ప్రజలకు అందజేయాలన్నారు.

మన ఊరు మన బడి కార్యక్రమంలో మంత్రి మాట్లాడుతూ.. పేద విద్యార్థులకు నాణ్యమైన విద్యను అందించేందుకు తెలంగాణ ప్రభుత్వం కట్టుబడి ఉందన్నారు. గతంలో తెలంగాణలో 200 గురుకుల పాఠశాలలు మాత్రమే అందుబాటులో ఉండేవి. అయితే, ప్రత్యేక రాష్ట్రం ఏర్పడిన తర్వాత ఈ సంఖ్య 1,000కి చేరుకుందని తెలిపారు.

విద్యా ప్రమాణాలు మరింత మెరుగుపరిచేందుకు చర్యలు తీసుకుంటున్నామని, మన ఊరు మన బండి కార్యక్రమం కింద రెండు దశల్లో జిల్లాలోని అన్ని ప్రభుత్వ పాఠశాలల్లో మౌలిక వసతులను అభివృద్ధి చేస్తామన్నారు.