కేసీఆర్‌, హ‌రీష్ బరితెగించి మాట్లాడుతున్నారు : మంత్రి ఉత్తమ్

హరీష్ రావు తన పేరు గోబెల్స్ రావు అని మార్చుకోవాలి.. కాళేశ్వరంలో మూడు బ్యారేజ్‌లు కూలిపోతే సిగ్గుతో తలదించుకోవాల్సింది పోయి ఎదురు దాడి చేస్తున్నారని నీటి పారుదల శాఖ మంత్రి ఉత్తమ్ కుమార్ రెడ్డి మండిప‌డ్డారు. సచివాలయంలో మీడియా చిట్ చాట్‌లో మాట్లాడుతూ.. కాళేశ్వరం విషయంలో BRS నాయకులు సిగ్గుతో తలవంచుకోవాలన్నారు. తెలంగాణ ప్రజల తలలను తాకట్టు పెట్టి కాళేశ్వరం కట్టారన్నారు. రాష్ట్రంలో ఇప్పుడు నడుస్తున్న ప్రాజెక్టులు కట్టింది కాంగ్రెస్ అని.. కేసీఆర్ కట్టిన కాళేశ్వరం కూలిపోయిందని.. కాళేశ్వరం నుంచి ఐదేళ్లలో 80 -90 టీఎంసీల‌ నీళ్లను మాత్రమే ఉపయోగించారని ఫైర్ అయ్యారు.

హరీష్ రావు అతి తెలివి తేటలు వాడటం ప్రజలు గమనిస్తున్నారన్నారు. కృష్ణా జలాల విషయంలో 2014 నుంచి 2020 వరకు ఆపేక్స్ కౌన్సిల్ భేటీలో కేసీఆర్ ఆంధ్రకు 512 టీఎంసీలు, తెలంగాణ కు 299 టీఎంసీలకు ఒప్పుకున్నారని గుర్తుచేశారు. ఉమ్మడి మహబూబ్ నగర్, నల్గొండ జిల్లాలోని పాలమూరు, కల్వకుర్తి, నెట్టెంపాడు, డిండి, ఎస్ఎల్బీసీ ప్రాజెక్టులను కేసీఆర్ ఎందుకు పూర్తి చెయ్యలేదని ప్ర‌శ్నించారు. కేసీఆర్, హరీష్ రావు బరితెగించి మాట్లాడుతున్నారని ధ్వ‌జ‌మెత్తారు. కేసీఆర్ అప్పులు తీర్చడానికి ఏడాదికి 16 నుంచి 20 వేల కోట్ల రూపాయలు కడుతున్నామన్నారు.

గతంలో వాళ్ళు చేసిన 45 టీఎంసీ మైనర్ ఇరిగేషన్, గోదావరి డివెర్షన్ సేవింగ్ 45 టీఎంసీల నిర్ణయం ప్రకారమే లేఖ రాశాం.. లేఖ కొత్తది కాదు.. గత BRS ఒప్పందాన్నే మేము లేఖను రాశామ‌ని పేర్కొన్నారు. 2020 కేఆర్ఎంబి సమావేశంలో కేసీఆర్ 34 శాతం నీటికి ఒప్పుకుంటే.. మేము 71 శాతం కావాలని లేఖ రాశామ‌ని వెల్ల‌డిచారు. పాలమూరుకు ఇప్పటికీ పూర్తిగా పర్యావరణం అనుమతులు రాలేదన్నారు. పదేళ్ళ పాటు పాలమూరు పూర్తి చేయకుండా అక్కడి ప్రజలను మోసం చేసింది కేసీఆర్‌.. 90 శాతం పనులు పూర్తి అయితే.. ఒక్క ఎకరాకు నీళ్లు ఎందుకు ఇయ్యలేదని ప్ర‌శ్నించారు.