ఎన్నికల వేళ.. 17 రోజుల బస్సు యాత్రను ప్రారంభించిన కేసీఆర్‌

బస్సు యాత్రలో భాగంగా బుధవారం సాయంత్రం మిర్యాలగూడలో జరిగిన కార్యక్రమంలో కేసీఆర్‌ మాట్లాడారు. ''ఈ రోజు పార్లమెంట్‌ ఎన్నికల సందర్భంగా మళ్లీ మీ దర్శనానికి రావడం జరిగింది. ఏం జరుగుతుంది ఈ రాష్ట్రంలో. నాలుగైదు నెలల కిందట ధీమాగా ఉన్న రైతు ఈ రోజు దిగాలుపడి చాలా బాధలో ఉన్నాడు. ఆ నాడు నేను నీళ్ల కోసం, నిధుల కోసం, కరెంటు కోసం, మన ప్రజల కోసం ఉద్యమిస్తే.. 15 సంవత్సరాల పోరాటం తర్వాత బ్రహ్మాండంగా మనం తెలంగాణ రాష్ట్రాన్ని సాధించుకున్నాం'' అని కేసీఆర్‌ అన్నారు.

అంతకుముందు కేసీఆర్‌ నల్గొండ జిల్లాలోని కొన్ని చోట్ల బస్సు దిగి రైతులతో మాట్లాడారు. ఈ క్రమంలోనే రైతులు తాము ఎదుర్కొంటున్న సమస్యలను ఆయనకు వివరించారు.

రాష్ట్రంలోని 17 లోక్‌సభ నియోజకవర్గాల్లో 12 నియోజకవర్గాల్లోని 40 పట్టణాల్లో మే 10 వరకు కొనసాగనున్న బస్సుయాత్రలో కేసీఆర్ ప్రసంగించనున్నారు. పగటిపూట, బీఆర్‌ఎస్ చీఫ్ వ్యవసాయ క్షేత్రాలను పరిశీలించి, నీరు, విద్యుత్ సరఫరా లేకపోవడం, అకాల వర్షాల కారణంగా నష్టపోయిన రైతుల సమస్యలను తెలుసుకునేందుకు వారితో సంభాషిస్తారు. సాయంత్రం బహిరంగ సభల్లో ప్రసంగిస్తారు. నాలుగు నెలల క్రితం కాంగ్రెస్ చేతిలో అధికారం కోల్పోయిన కేసీఆర్ ఇప్పటికే కరీంనగర్, మెదక్, చేవెళ్ల లోక్‌సభ నియోజకవర్గాల్లో బహిరంగ సభల్లో ప్రసంగించారు.

హైదరాబాద్, సికింద్రాబాద్, చేవెళ్ల, మల్కాజిగిరి, ఆదిలాబాద్ మినహా రాష్ట్రంలోని మిగతా అన్ని లోక్‌సభ స్థానాల్లో బస్సు యాత్ర సాగనుంది. బస్సు యాత్ర విజయవంతానికి బీఆర్‌ఎస్ పెద్ద ఎత్తున ఏర్పాట్లు చేసింది. రాష్ట్రంలో వేడిగాలులు వీస్తున్న నేపథ్యంలో ఆ పార్టీ కొన్ని జాగ్రత్తలు తీసుకుంటోంది. అవసరమైన చోట చిన్న బస్సులను ఏర్పాటు చేశారు. ఆయా నియోజకవర్గాల్లో యాత్ర విజయవంతానికి నేతలకు కూడా బాధ్యతలు అప్పగించారు.

యాత్ర సందర్భంగా కేసీఆర్‌కు తగిన భద్రతా ఏర్పాట్లు చేస్తున్నారు, పార్టీ బౌన్సర్లతో సహా ప్రైవేట్ సెక్యూరిటీ సిబ్బందిని మోహరించింది. నవంబర్ 2023లో జరిగిన అసెంబ్లీ ఎన్నికల్లో కాంగ్రెస్ చేతిలో అధికారాన్ని కోల్పోయిన తర్వాత, ఐదుగురు సిట్టింగ్ ఎంపీలు, ముగ్గురు ఎమ్మెల్యేలు, ఇతర ప్రజాప్రతినిధులు కాంగ్రెస్ లేదా బీజేపీలో చేరడంతో బీఆర్‌ఎస్‌ వరుస పరాజయాలను అందుకుంది. అసెంబ్లీ ఎన్నికల్లో 119 మంది సభ్యులున్న సభలో బీఆర్‌ఎస్ 39 స్థానాలను కైవసం చేసుకుంది.