అసదుద్దీన్ వ్యాఖ్య‌ల‌పై కాంగ్రెస్ స్ట్రాంగ్ కౌంట‌ర్‌

అసదుద్దీన్ వ్యాఖ్య‌ల‌పై కాంగ్రెస్ స్ట్రాంగ్ కౌంట‌ర్ ఇచ్చింది. గాంధీభవన్ లో టీపీసీసీ సీనియర్ ఉపాధ్య‌క్షుడు నిరంజన్ మాట్లాడుతూ.. గల్లీలోని కుక్క గల్లీలోనే మొరుగుతుందని.. ఎంపీ అసదుద్దీన్ మాట్లాడిన మాటలు కుక్క మొరిగినట్టు ఉందని వ్యాఖ్యానించారు. హైదరాబాద్ లో రాహుల్ గాంధీ పోటీ చేయాలని అసద్ అంటున్నాడు.. రాహుల్ ఇక్కడ పోటీ చేస్తే అసద్ ఓటమి తప్పదని అన్నారు. అసద్ కుటుంబం, ఎంఐఎం పార్టీ కాంగ్రెస్ కి వ్యతిరేకంగా ఉండొచ్చు కానీ.. ముస్లింలకు రాహుల్ గాంధీ మీద.. కాంగ్రెస్ పార్టీ మీద అభిమానం, ప్రేమ ఉందని పేర్కొన్నారు.

మీరు ముస్లింలకు గానీ పాత బస్తి అభివృద్ధికి ఏమి చేయలేదని ముస్లింలు గమనించారని అన్నారు. రాహుల్ గాంధీ భారత్ జోడో యాత్ర తో దేశంలో ప్రేమ పంచి అభిమానం సొంతం చేసుకున్నార‌ని పేర్కొన్నారు. కాంగ్రెస్ వల్లనే మీరు అన్ని రకాలుగా అభివృద్ధి చెందారని అన్నారు. మోదీ మెప్పుకోసం అసదుద్దీన్ ఇలా మాట్లాడుతున్నారని ఆరోపించారు. బాబ్రీ మసీదు కూల్చినపుడు ఉత్తర ప్రదేశ్ లో కళ్యాణ్ సింగ్ బీజేపీ ప్రభుత్వం ఉందన్న విషయం అసద్ కు తెలియదా అని ప్ర‌శ్నించారు. బీజేపీ మెప్పుకోసం అసద్ అన్ని రకాలుగా కష్టపడుతున్నారని ఫైర్ అయ్యారు.