తుమ్మలతో కాంగ్రెస్ ముఖ్యనేతలు భేటీ

మాజీ మంత్రి తుమ్మల నాగేశ్వరరావుతో శుక్ర‌వారం కాంగ్రెస్ ముఖ్యనేతలు భేటీ అయ్యారు. హైటెక్ సిటీ మాదాపూర్ లోని మై హోమ్ భుజాలోని తుమ్మల నాగేశ్వరరావు నివాసానికి వెళ్లిన కాంగ్రెస్ నేత‌లు ఆయ‌న‌తో భేటీ అయ్యారు. ఏఐసీసీ ఇంచార్జ్ మానిక్ రావ్ ఠాక్రే, పీసీసీ అధ్యక్షుడు రేవంత్ రెడ్డి, పీఎల్పీ నేత భట్టి విక్రమార్క, ప్రచార కమిటీ కో.చైర్మన్ పొంగులేటి శ్రీనివాస్ రెడ్డి తదితరులు తుమ్మ‌ల నివాసానికి వెళ్లారు. తుమ్మల నివాసంలో భేటీ కొన‌సాగుతుంది. ఈ భేటీలో తుమ్మ‌ల కాంగ్రెస్‌లో చేరిక‌పై స్ప‌ష్ట‌త వ‌చ్చే అవ‌కాశం ఉంది.

ఈ నెల 16, 17 తేదీల‌లో జ‌రుగ‌నున్న‌ సీడ‌బ్ల్యూసీ స‌మావేశాలు జరుగ‌నున్నాయి. ఈ స‌మావేశాల‌కు మ‌ల్లిఖార్జున ఖ‌ర్గే, సోనియా గాంధీ, రాహుల్ గాంధీ, ప్రియాంక గాంధీ త‌దిత‌ర అగ్ర‌నేత‌లు హాజ‌రుకానున్నారు. ఈ నేప‌థ్యంలో తుమ్మ‌లతో కాంగ్రెస్ నేత‌ల భేటీ ప్రాధాన్య‌త సంత‌రించుకుంది. ఈ స‌మావేశాల‌లోనే తుమ్మ‌లను కాంగ్రెస్‌లో చేర్చుకునేందుకు నాయ‌కులు ప్ర‌య‌త్నాలు చేస్తున్న‌ట్లు స‌మాచారం.