దీపావళి అంటే మాకు చిచ్చు బుడ్లు.. వాళ్లకు మాత్రం సారా బుడ్లు : సీఎం రేవంత్ రెడ్డి

కేటీఆర్ బామ్మర్ది రాజు పాకాల విందుపై సీఎం రేవంత్ రెడ్డి హాట్ కామెంట్స్ చేశారు. మీడియా చిట్‌చాట్‌లో ఆయ‌న మాట్లాడుతూ.. మాకు దీపావళి పండుగ అంటే చిచ్చు బుడ్లు.. వాళ్లకు మాత్రం సారా బుడ్లు అని ఎద్దేవా చేశారు. దీపావళి దావత్ అలా చేస్తారు అని మాకు తెలియదన్నారు. రాజ్ పాకాల ఏం చేయక పోతే ఎందుకు పారిపోయారన్నారు. ముందస్తు బెయిల్ ఎందుకు అడిగారని ప్ర‌శ్నించారు. ఇంటి దావత్ చేస్తే క్యాసినో కాయిన్స్, విదేశీ మద్యం ఎందుకు దొరికాయన్నారు.

ఎవ్వరు ఎంత అడ్డుకున్నా మూసీ పునరుజ్జీవం చేసి తీరుతాన్నారు. మొదటి ఫేస్ 21 కిలో మీటర్ల వరకు అభివృద్ధి చేస్తామ‌న్నారు. గండిపేట, హిమాయత్ సాగర్ ల నుండి బాపు ఘాట్ వరకు మొదటి ఫేస్ పనులు చేపడతామ‌న్నారు. నెల రోజుల్లో డిజైన్లు పూర్తి అవుతాయన్నారు. మల్లన్న సాగర్ నుండి గోదావరి జలాలను తెచ్చి గండిపేటలో పోస్తాం.. దీనికి సంబంధించి ట్రంక్ లైన్ కోసం నవంబర్ మొదటి వారంలో టెండర్లు పిలుస్తామ‌ని తెలిపారు. బాపుఘాట్ వద్ద ప్రపంచంలోనే ఎతైన గాంధీ విగ్రహాన్ని ఏర్పాటు చేస్తామ‌న్నారు. బాపు ఘాట్ వద్ద బ్రిడ్జి కం బ్యారేజి నిర్మాణం చేపడతామ‌ని తెలిపారు. అక్కడ అభివృద్ధి కోసం ఆర్మీ ల్యాండ్ కూడా ఆడిగామని వెల్ల‌డించారు. 15 రోజుల్లో ఎస్టీపీ లకు టెండర్లు పిలుస్తామ‌న్నారు. మూసీని ఎకో ఫ్రెండ్లీ అండ్ వెజిటేరియన్ కాన్సెప్ట్ తో అభివృద్ధి చేస్తామ‌న్నారు. మూసీ వెంట అంతర్జాతీయ యూనివర్సిటీ, గాంధీ ఐడియాలజీ సెంటర్, రీక్రియేషన్ సెంటర్, నేచర్ క్యూర్ సెంటర్ లను ఏర్పాటు చేస్తామ‌ని తెలిపారు.

ఈ క్ర‌మంలోనే మాజీ సీఎం కేసీఆర్‌పై సీఎం రేవంత్ రెడ్డి హాట్ కామెంట్స్ చేశారు. కేసీఆర్ ఎక్స్పైరీ మెడిసిన్ అన్నారు. వన్ ఇయర్‌లో కొడుకు చేత తండ్రిని ఫినిష్ చేశా.. ఆ తర్వాత బావతో బామ్మర్దిని ఫినిష్ చేస్తాం.. ఆ తరువాత హరీష్ ను ఎలా డీల్ చేయాలో మాకు తెలుసు అన్నారు. ఈ క్ర‌మంలోనే కేటీఆర్ హరీష్ రావులకు సీఎం రేవంత్ రెడ్డి సవాల్ విసిరారు. వాడపల్లి నుంచి వికారాబాద్ వరకు పాదయాత్ర చేస్తా.. కేటీఆర్ హరీష్ రావు మీరు కూడా రండి.. మూసీని అభివృద్ధి చేయాలో.. లేదో ప్రజలనే అడుగుదాం అన్నారు.