మనీశ్ సిసోడియా అరెస్టును ఖండించిన కేసీఆర్

ఢిల్లీ లిక్కర్ స్కాం కేసులో సీబీఐ, ఈడీ అధికారులు నిందితులుగా భావిస్తున్న వారిని ఒక్కొక్కరిగా అరెస్ట్ చేస్తున్నారు. ఈ కేసులో ఇప్పటివ‌ర‌కూ 11 మందిని అరెస్ట్ చేసిన అధికారులు.. నిన్న ఢిల్లీ ఉప ముఖ్యమంత్రి మనీశ్ సిసోడియాను అరెస్ట్ చేశారు. మనీశ్ సిసోడియా అరెస్టు నేఫ‌థ్యంలో ఈ కేసుపై మొదటిసారిగా సీఎం కేసీఆర్ స్పందించారు. ఢిల్లీ ఉప ముఖ్యమంత్రి మనీశ్ సిసోడియా అరెస్టును కేసీఆర్ తీవ్రంగా ఖండించారు. అదానీ అంశంపై నుంచి ప్రజల దృష్టి మరల్చేందుకే.. ఈ అరెస్టులు చేస్తున్నారని కేసీఆర్ ఆరోపించారు. అదానీకి ప్రధాని మోదీకి మధ్య ఉన్న అనుబంధం చర్చ జరగకుండా ఉండేందుకే ఈ అరెస్టులని కేసీఆర్ ఆక్షేపించారు. ఇప్ప‌టివ‌ర‌కూ ఈ కేసుపై స్పందించని సీఎం కేసీఆర్.. మొదటి సారి స్పందించటంపై సర్వత్రా ఆసక్తి నెలకొంది.