కాంగ్రెస్‌లో చేరనున్న మ‌రో ఇద్ద‌రు బీఆర్‌ఎస్ ఎమ్మెల్యేలు

జూలై 24న ప్రారంభం కానున్న రాష్ట్ర బడ్జెట్ సమావేశాల ప్రారంభానికి ముందు బీఆర్ఎస్ నుంచి కాంగ్రెస్‌లోకి ఎమ్మెల్యేల ఫిరాయింపులు వేగవంతం కానున్నాయి. రాజేంద్ర నగర్ ఎమ్మెల్యే టీ ప్రకాష్ గౌడ్, శేరిలింగంపల్లి ఎమ్మెల్యే ఆరెకపూడి గాంధీ కాంగ్రెస్‌లో చేరుతార‌ని ఊహాగానాలు జోరందుకున్న నేప‌థ్యంలో కేసీఆర్ నేతృత్వంలోని బీఆర్‌ఎస్‌కు కేవలం 30 మంది ఎమ్మెల్యేలు మాత్రమే ఉన్నారు.

గతంలో ఏడుగురు బీఆర్‌ఎస్ ఎమ్మెల్యేలు కాంగ్రెస్‌లో చేరారు. శుక్రవారం ప్రకాష్‌గౌడ్‌ తిరుపతిలోని వెంకటేశ్వర స్వామిని దర్శించుకుని పూజలు చేశారు. సాయంత్రంలోగా ముఖ్యమంత్రి రేవంత్‌రెడ్డి సమక్షంలో కాంగ్రెస్‌లో చేరబోతున్నట్లు ఆయన మీడియాతో వెల్లడించారు. 'కాంగ్రెస్‌లో చేరాలని నన్ను ఒత్తిడి చేయడం లేదు. నియోజకవర్గం అభివృద్ధి కోసమే ఈ నిర్ణయం తీసుకున్నానని వెల్ల‌డించారు.

తాజా ఫిరాయింపులపై బీఆర్‌ఎస్ వర్కింగ్ ప్రెసిడెంట్ కేటీఆర్‌ స్పందిస్తూ.. బీఆర్‌ఎస్ ఎమ్మెల్యేలను కాంగ్రెస్ ప్రభుత్వం తన గుప్పిట్లోకి తీసుకోవాల‌ని ఒత్తిడి తెస్తోందని ఆరోపించారు. దీనిపై ప్ర‌కాష్ గౌడ్ స్పందిస్తూ.. ఆ విధంగా ప్రభావితం అవ‌డానికి తాను చిన్న పిల్లవాడిని కాదని చెప్పాడు.

నాలుగుసార్లు ఎమ్మెల్యేగా గెలిచిన ప్రకాష్‌గౌడ్‌ రెండు నెలల క్రితం రేవంత్‌రెడ్డిని కలిశారు. అయితే అప్పుడు ఆయన కాంగ్రెస్‌లో చేరుతారనే చర్చను కొట్టిపారేశారు. ఎర్రవెల్లిలోని బీఆర్‌ఎస్‌ అధినేత కే చంద్రశేఖర్‌రావు ఫామ్‌హౌస్‌లో జరిగిన సమావేశానికి హాజరయ్యేందుకు ఆయన వెళ్లారు. అక్కడ ఆయ‌న‌తో పాటు మిగిలిన బీఆర్‌ఎస్ ఎమ్మెల్యేలు గులాబీ పార్టీకి అండగా ఉంటామని పార్టీ అధినేతకు హామీ ఇచ్చారు.

ఇదిలావుంటే.. శేరిలింగంపల్లి ఎమ్మెల్యే ఆరెకపూడి గాంధీ శనివారం కాంగ్రెస్‌లో చేరనున్నారు. మరికొద్ది రోజుల్లో మరికొంత మంది బీఆర్‌ఎస్ ఎమ్మెల్యేలు కాంగ్రెస్‌లోకి వెళ్లేందుకు సిద్ధంగా ఉన్నారని సమాచారం. బీఆర్‌ఎస్‌ హయాంలో హైదరాబాద్‌తో పాటు చుట్టుపక్కల ప్రాంతాల్లో కోల్పోయిన‌ ఆధిపత్యం కోసం మ‌ళ్లీ కాంగ్రెస్‌ ప్రయత్నిస్తోంది. ఈ ప్రాంతంలో గ‌త‌ అసెంబ్లీ ఎన్నికల్లో బీఆర్‌ఎస్‌ 18 సీట్లు గెలుచుకోగా, కాంగ్రెస్‌ 3, ఎంఐఎం 7, బీజేపీ 1 సీటు గెలుచుకున్నాయి.