అశ్విన్ షాకింగ్ నిర్ణ‌యం వెన‌క కార‌ణం ఇదే..!

ఇండియన్ ప్రీమియర్ లీగ్ (ఐపీఎల్)కు టీమిండియా స్టార్ స్పిన్నర్ రవిచంద్రన్ అశ్విన్ బుధవారం రిటైర్మెంట్ ప్రకటించాడు. 2009 నుంచి ఐపీఎల్ ఆడుతున్న అశ్విన్ 16 సీజన్లు ఆడాడు. అశ్విన్ చివరిసారిగా IPL 2025లో చెన్నై సూపర్ కింగ్స్ తరపున ఆడాడు. డిసెంబరులో అంతర్జాతీయ క్రికెట్ నుండి రిటైర్ అయిన 38 ఏళ్ల అశ్విన్.. కొన్ని నెలల విరామం తర్వాత ఈ నిర్ణయం తీసుకున్నాడు. అశ్విన్ తన రిటైర్మెంట్ గురించి సోషల్ మీడియా ప్లాట్‌ఫామ్ ఎక్స్‌లో తెలియజేశాడు.

అశ్విన్ ఎక్స్‌లో "ప్రత్యేకమైన రోజు.. ప్రత్యేక ప్రారంభం. ప్రతి ముగింపు కొత్త ప్రారంభానికి దారితీస్తుందని అంటారు. IPL క్రికెటర్‌గా నా ప్రయాణం ఈరోజుతో ముగుస్తుంది, కానీ నేను ఆటను అన్వేషిస్తూనే ఉన్నాను. నేను ఇప్పుడు వివిధ లీగ్‌లలో ఆడతాను. సంవత్సరాలుగా నేను కలిగి ఉన్న అన్ని అద్భుతమైన జ్ఞాపకాలు, సంబంధాలకు.. నేను అన్ని ఫ్రాంచైజీలకు కృతజ్ఞతలు చెప్పాలనుకుంటున్నాను. ముఖ్యంగా IPL, BCCI వారు నాకు అందించిన ప్రోత్సాహాల‌కు అన్నింటికీ ధ‌న్యవాదాలు. నేను ఇంకా క్రికెట్‌ను ఆస్వాదించడానికి, ముందుకు సాగ‌డం కోసం ఎదురుచూస్తున్నాను" అని రాశాడు.

అశ్విన్ 2009లో చెన్నై సూపర్ కింగ్స్‌తో IPL అరంగేట్రం చేశాడు. తన చివరి సీజన్‌ను కూడా CSK తరపునే ఆడాడు. అశ్విన్ తన ఐపీఎల్ కెరీర్‌లో 221 మ్యాచ్‌లు ఆడాడు. కెరీర్‌లో 30.22 సగటుతో మొత్తం 187 వికెట్లు తీశాడు. అత్యుత్తమ బౌలింగ్ ప్రదర్శన 4/34. బ్యాటింగ్‌లో 13.02 సగటుతో 833 పరుగులు చేశాడు. IPL కెరీర్ మొత్తంలో అశ్విన్ చెన్నై సూపర్ కింగ్స్, రైజింగ్ పూణె సూపర్ జెయింట్స్, పంజాబ్ కింగ్స్, ఢిల్లీ క్యాపిటల్స్, రాజస్థాన్ రాయల్స్ జ‌ట్ల త‌రుపున ఆడాడు.

విదేశీ లీగ్‌లలో ఆడగలనని అశ్విన్ తన పోస్ట్‌లో సూచించాడు. ఈ క్ర‌మంలో అశ్విన్ ఇప్పుడు UAE యొక్క ILT20, దక్షిణాఫ్రికా SA20, ఆస్ట్రేలియా బిగ్ బాష్ (BBL), ఇంగ్లాండ్ ది హండ్రెడ్, USA మేజర్ లీగ్ క్రికెట్ (MLC) వంటి లీగ్‌ల‌లో ఆడ‌వ‌చ్చు.

బీసీసీఐ నిబంధనల ప్రకారం.. విదేశీ టీ20 లీగ్ ఆడాలంటే పురుషుల ఆటగాడు కొన్ని నిబంధనలను పాటించాల్సి ఉంటుంది. అంతర్జాతీయ క్రికెట్ నుంచి రిటైర్మెంట్, దేశవాళీ క్రికెట్ నుంచి రిటైర్మెంట్. IPL నుండి రిటైర్మెంట్ తీసుకోవాలి. మునాఫ్ పటేల్, యువరాజ్ సింగ్, రాబిన్ ఉతప్ప, యూసుఫ్ పఠాన్, అంబటి రాయుడు, శిఖర్ ధావన్, దినేష్ కార్తీక్‌లు ఓవర్సీస్ టీ20 లీగ్‌లలో రంగంలోకి దిగిన ఇత‌ర‌ మాజీ ఆటగాళ్లు.