వెస్టిండీస్‌లో జరిగే టీ20 ప్రపంచకప్‌కు ఉగ్ర‌ ముప్పు.. భారత్ మ్యాచ్‌ల వేదికలివే..!

టీ20 ప్రపంచ కప్ అమెరికా, వెస్టిండీస్‌లో జ‌రుగ‌నుంది. టోర్నీ నేప‌థ్యంలో వెస్టిండీస్‌కు ఉగ్రదాడుల బెదిరింపులు వచ్చాయి. రోహిత్ శర్మ నేతృత్వంలోని భారత జట్టు ఈ గ్లోబల్ టోర్నీలో పాల్గొననుంది. ఉగ్రవాద దాడి ముప్పు నేప‌థ్యంలో వెస్టిండీస్‌లో భద్రతను పెంచారు. క్రికెట్ వెస్టిండీస్ (CWI) కూడా భద్రతకు సంబంధించి హామీ ఇచ్చింది. భారత్‌ తన గ్రూప్‌ స్టేజ్‌ మ్యాచ్‌లను వెస్టిండీస్‌లో కాకుండా అమెరికాలో ఆడనుండడం కాస్త ఊరట కలిగించే విషయమే.

జూన్ 5న న్యూయార్క్‌లో ఐర్లాండ్‌తో జరిగే టీ20 ప్రపంచకప్‌లో భారత జట్టు తన ప్రారంభ మ్యాచ్‌ను ఆడ‌నుంది. భార‌త్‌ అన్ని గ్రూప్ దశ మ్యాచ్‌లను అమెరికాలో ఆడుతుంది. సూపర్-8 దశకు అర్హత సాధిస్తే టీమిండియా మ్యాచ్‌లు వెస్టిండీస్‌లో జ‌రుగుతాయి. ఐర్లాండ్‌తో ఆడిన తర్వాత జూన్ 9న పాకిస్థాన్‌తో జూన్ 12న అమెరికాతో, జూన్ 15న కెనడాతో భారత్ ఆడనుంది. భారత జట్టు తొలి మూడు మ్యాచ్‌లు న్యూయార్క్‌లో జరగనుండగా గ్రూప్ దశలో చివరి మ్యాచ్ లాడర్‌హిల్‌లో జ‌రుగుతుంది.

ఈ గ్లోబల్ టోర్నమెంట్ కోసం భారత క్రికెట్ కంట్రోల్ బోర్డు (బీసీసీఐ) గత వారం 15 మంది సభ్యులతో కూడిన జట్టును ప్రకటించింది. ఈ టోర్నీలో రోహిత్ శర్మ కెప్టెన్సీలో భారత జట్టు ఆడనుండగా.. హార్దిక్ పాండ్యా వైస్ కెప్టెన్‌గా వ్యవహరించనున్నాడు. 2007 నుండి టీ20 ప్రపంచకప్ టైటిల్‌ను భారత్ ఎన్నడూ గెలవలేదు. ఈసారి టైటిల్ సాధించాల‌ని భార‌త్ క‌సితో ఉంది.

టీ20 ప్రపంచకప్‌లో తొలిసారిగా 20 జట్లు పాల్గొంటుండగా.. అన్ని జట్లను ఐదు చొప్పున నాలుగు గ్రూపులుగా విభజించారు. కెనడా, ఐర్లాండ్‌, పాకిస్థాన్‌, అమెరికాతో పాటు భారత్‌ గ్రూప్‌-ఎలో ఉంది. గ్రూప్ దశలో ఒక్కో గ్రూపు నుంచి మొదటి రెండు స్థానాల్లో నిలిచిన జట్లు సూపర్-ఎయిట్ దశకు అర్హత సాధిస్తాయి.

టీ20 ప్రపంచకప్‌లో ఉగ్రదాడి జరుగుతుందని ఉత్తర పాకిస్థాన్ నుంచి బెదిరింపులు వచ్చాయి. మీడియా కథనాల ప్రకారం.. ప్రో ఇస్లామిక్ స్టేట్ (IS) క్రీడా కార్యక్రమాల సమయంలో దాడులు చేయడానికి ప్లాన్ చేసింది. IS ఖొరాసన్ ఆఫ్ఘనిస్తాన్-పాకిస్తాన్ శాఖ నుండి ఒక వీడియో సందేశం విడుదల చేయబడింది, దీనిలో అనేక దేశాలలో దాడులు చేయడం గురించి మాట్లాడింది. దానిలో చేరాలని మద్దతుదారులకు విజ్ఞప్తి చేసింది.

జూన్‌ నుంచి వెస్టిండీస్‌లోని పలు చోట్ల టీ20 ప్రపంచకప్ మ్యాచ్‌లు జరగనున్నాయి. బార్బడోస్, గయానా, ఆంటిగ్వా, బార్బుడా, సెయింట్ విన్సెంట్, సెయింట్ లూసియా, గ్రెనడైన్స్, ట్రినిడాడ్ అండ్ టొబాగో ఈ గ్లోబల్ టోర్నమెంట్ మ్యాచ్‌లకు ఆతిథ్యం ఇవ్వనున్నాయి. గ్రూప్ స్టేజ్ అడ్డంకిని దాటడంలో భారత్ విజయవంతమైతే.. దాని తదుపరి మ్యాచ్‌లు చాలా వరకు కరేబియన్‌లో ఉంటాయి.