జాగ్ర‌త్త‌.. అత‌డు ఒంటి చేత్తో మ్యాచ్ గమనాన్నే మార్చేస్తాడు..!

భారత్‌తో జరిగే సెమీఫైనల్‌కు ముందు ఇంగ్లాండ్ మాజీ ఫాస్ట్ బౌలర్ స్టూవర్ట్ బ్రాడ్ తన జట్టుకు కొన్ని ముఖ్యమైన సలహాలు ఇచ్చాడు. హార్దిక్ పాండ్యా ఒంటి చేత్తో మ్యాచ్ గమనాన్ని మార్చగల ఆటగాడిగా బ్రాడ్ అభివర్ణించాడు. పాండ్యా ప్రభావం స్కోరు బోర్డుపై ఉన్న సంఖ్యలకు మించి ఉంటుందని బ్రాడ్ నొక్కిచెప్పాడు.

బ్రాడ్ ప్రకారం.. భారత ఆల్ రౌండర్ హార్దిక్ పాండ్యా మ్యాచ్ ఫలితాన్ని మార్చే అరుదైన సామర్థ్యాన్ని కలిగి ఉన్నాడు. పాండ్యా ఇన్నింగ్స్ చివరిలో త్వరగా పరుగులు చేయడం ద్వారా లేదా బంతితో అద్భుతంగా ప్రదర్శన ఇవ్వడం ద్వారా భారత్ మ్యాచ్‌లను గెలిపించ‌గ‌ల‌డు. హార్దిక్ పాండ్యా అధిక ఒత్తిడి ఉన్న‌ మ్యాచ్‌లను ఆస్వాదిస్తాడు. పూర్తి ఆత్మవిశ్వాసంతో ఉంటాడు.. ఇది అతని చుట్టూ ఉన్న వ్యక్తులను కూడా ఉత్సాహంగా ఉంచుతుంది. ఇంగ్లాండ్‌తో జరిగే సెమీ-ఫైనల్ మ్యాచ్ పాండ్యా ఐపీఎల్ హోమ్ గ్రౌండ్‌లో జరగనుండటం గమనించదగ్గ విషయం.. ఇది అత‌డికి మరింత సహాయపడుతుంది.

వాంఖడే స్టేడియంలోని పిచ్, పరిస్థితులు హార్దిక్ పాండ్యాకు బాగా తెలుసని బ్రాడ్ విశ్వసిస్తున్నాడు. అతనికి ప్రేక్షకుల మద్దతు ఉంది. ఇది అతని ఆటను మరింత మెరుగుపరుస్తుంది. హార్దిక్ పాండ్యాను ఆపడానికి ఇంగ్లాండ్ ఎలాంటి టెక్నిక్‌లను అవలంబించాలో బ్రాడ్ వివరించాడు.

హార్దిక్ పాండ్యా తన షాట్లను స్వేచ్ఛగా ఆడలేని విధంగా ముందుగానే ప్లాన్ చేయాలని బ్రాడ్ అభిప్రాయపడ్డాడు. నేను ఇంగ్లీష్ బౌలర్ అయితే.. 12వ ఓవర్ ముందు అతన్ని క్రీజులోకి తీసుకురావడానికి నా శాయశక్తులా ప్రయత్నిస్తాను.. తద్వారా నేను దానికి అనుగుణంగా బౌలింగ్ చేయగలను.. ఎందుకంటే ఆ స‌మ‌యంలో అతడు షాట్లు ఆడే స్థితిలో ఉండడు. చివర్లో దూకుడుగా షాట్లు ఆడాల‌ని అతడు అనుకుంటే.. సింగిల్స్, డబుల్స్‌తో కొన్ని పరుగులు చేయాలనుకుంటాడు.. దీంతో చివరి నాలుగు ఓవర్లలో అతడు నన్ను మరింత ఇబ్బంది పెట్టవచ్చు.. కాబట్టి నేను అంతకు ముందే అతన్ని అవుట్ చేయడానికి ప్రయత్నిస్తాను. ఆట ముగిసేలోపు భారత్ మూడు లేదా నాలుగు వికెట్లు కోల్పోతే, హార్దిక్ స్కోరును 200 దాటించగలడు. అప్పుడు మీరు చాలా ఇబ్బందుల్లో పడతారని ఇంగ్లాండ్ ఆట‌గాళ్ల‌కు సూచించాడు.

భారత జట్టు ఇన్నింగ్స్ మొదటి అర్ధభాగంలో బలమైన పునాది వేస్తే పాండ్యా మరింత ప్రమాదకరంగా మారుతాడని బ్రాడ్ వివరించాడు. పాండ్యా ఆత్మవిశ్వాసం, బలమైన స్థానంలో ఉండటం మ్యాచ్‌ను ప్రత్యర్థి జట్టుకు దూరం చేయగలదు. మొదటి 10 ఓవర్లలో భారత్ వికెట్ కోల్పోకపోతే, హార్దిక్ పాండ్యా ప్రమాదకరంగా మారతాడు. అతను క్రీజులోకి వచ్చినప్పుడు పూర్తి ఆత్మవిశ్వాసంతో ఉంటాడు. అతనికి తనదైన స్టైల్‌, సానుకూల అహం ఉంది.. అతను మ్యాచ్ ఫలితాన్ని మార్చగలడని నమ్ముతాడు. అతను చాలా సన్నగా ఉన్నా.. 100 మీటర్ల సిక్స్ ఎలా కొట్టగలడోన‌ని ఆశ్చర్యపోతాం.. కానీ అతను చాలా బలంగా ఉన్నాడు.. ఇలాంటివి అత‌డు అప్రయత్నంగా చేస్తాడ‌ని బ్రాడ్ త‌న జ‌ట్టును హెచ్చ‌రించాడు.