Video : 10 బంతులే ఆడాడు.. కానీ, ఎంత‌టి విధ్వంసం సృష్టించాడంటే..?

షిమ్రాన్ హెట్మెయర్ 10 బంతుల్లో 39 పరుగులతో విధ్వంస‌క‌ర‌ ఇన్నింగ్స్ ఆడాడు. ఇందులో ఒక ఓవర్‌లో ఐదు సిక్సర్లు బాదాడు. హెట్మెయర్ ఇన్నింగ్స్ సహాయంతో గ్లోబల్ సూపర్ లీగ్ 2025 సెమీ-ఫైనల్స్‌లో గయానా అమెజాన్ వారియర్స్ 4 వికెట్ల తేడాతో హోబర్ట్ హరికేన్స్‌ను ఓడించి ఫైన‌ల్‌కు చేరింది. జూలై 18న గయానా అమెజాన్ వారియర్స్, రంగ్‌పూర్ రైడర్స్ మధ్య ఫైనల్ మ్యాచ్ జరగనుంది.

ఈ మ్యాచ్‌లో గయానా అమెజాన్ వారియర్స్ జట్టు 126 పరుగుల లక్ష్యాన్ని ఛేదించింది. ఇన్నింగ్స్ 9వ ఓవర్ సమయానికి వారియర్స్ స్కోరు 42 పరుగులకే మూడు వికెట్లు కోల్పోయింది. ఆ తర్వాత హెట్మెయర్ క్రీజులోకి వచ్చాడు. జట్టు 63 బంతుల్లో 84 పరుగులు చేయాల్సి ఉంది. హెట్మెయర్ తొలుత‌ డాట్ బాల్ ఆడాడు. ఆ తర్వాత సింగిల్ తీసుకున్నాడు. ఆ తర్వాతి ఓవర్‌లోనే హెట్‌మెయర్ తన దూకుడును ప్రదర్శించాడు. అలెన్ వేసిన ఇన్నింగ్స్ 10వ ఓవర్లో హెట్మెయర్ సిక్సర్లు బాదాడు. వ‌రుస నాలుగు బంతుల్లో నాలుగు సిక్సులు బాదాడు. ఐదో బంతికి రెండు పరుగులు చేశాడు. ఆ తర్వాత డీప్ మిడ్ వికెట్ వైపు సిక్సర్ కొట్టి ఓవర్ ముగించాడు. దీంతో ఈ ఓవర్‌లో 32 పరుగులు వచ్చాయి.

ఆ తర్వాత ఓవ‌ర్‌లో మీర్ వేసిన బంతికి హెట్మెయర్ సిక్సర్ బాదాడు. తర్వాతి ఓవర్‌లో హెట్మెయర్ ఇన్నింగ్స్ ముగిసింది. హెట్మెయర్ యొక్క తుఫాను ఇన్నింగ్స్ మ్యాచ్ గతిని మార్చింది. ఈ క్ర‌మంలోనే మొయిన్ అలీ నేతృత్వంలోని గయానా అమెజాన్ వారియర్స్ విజయం సాధించింది.

ఆస్ట్రేలియాతో ఐదు మ్యాచ్‌ల T20 ఇంటర్నేషనల్ సిరీస్‌కు ముందు హెట్మెయర్ రెచ్చిపోయాడు. జూలై 20 నుంచి ఆస్ట్రేలియా, వెస్టిండీస్ మధ్య టీ20 ఇంటర్నేషనల్ సిరీస్ ప్రారంభం కానుంది.