గాయం కారణంగా భారీ అవ‌కాశాన్ని కోల్పోయిన అశ్విన్..!

భారత జట్టు మాజీ ఆఫ్ స్పిన్నర్ రవిచంద్రన్ అశ్విన్ బిగ్ బాష్ లీగ్ 15 నుంచి తన పేరును ఉపసంహరించుకున్నాడు. గాయం కారణంగా అశ్విన్ ఈ నిర్ణయం తీసుకున్నాడు. చెన్నైలో శిక్షణలో ఉండగా అశ్విన్ మోకాలికి గాయమైంది. దీంతో రవిచంద్రన్ అశ్విన్ అరుదైన ఘ‌న‌త సాధించే అవ‌కాశాన్ని కోల్పోయాడు. అశ్విన్ బిగ్ బాష్ లీగ్‌లో ఆడిన తొలి భారతీయ క్రికెటర్‌గా అవతరించి ఉండేవాడు. అశ్విన్ బిబిఎల్‌లో సిడ్నీ థండర్‌తో ఒప్పందం కుదుర్చుకున్నాడు. అయితే గాయం కార‌ణంగా బీబీఎల్ నుండి వైదొలగనున్న‌ట్లు సోషల్ మీడియా పోస్ట్ ద్వారా తెలియజేశాడు. అశ్విన్ ఖచ్చితంగా సీజన్ రెండవ భాగంలో ఫ్రాంచైజీలో చేరాలని సూచించాడు.

అశ్విన్ తన ఇన్‌స్టాగ్రామ్ ఖాతాలో పోస్ట్ చేశాడు. 'రాబోయే సీజన్ కోసం చెన్నైలో శిక్షణలో ఉండ‌గా నా మోకాలికి గాయమైంది. కావున‌ నేను BBL 15లో పాల్గొనలేను. నేను జ‌ట్టులో భాగమై మీ ముందు ఆడటానికి ఉత్సాహంగా ఉన్నందున ఈ విష‌యం చెప్పడం కష్టంగా ఉంది. ఇప్పుడు నేను పునరావాసం, రికవరీ కోసం పని చేస్తాను, తద్వారా నేను బలంగా తిరిగి వస్తాను. క్లబ్‌తో నా మొదటి పరస్పర చర్యలో సిబ్బంది, ఆటగాళ్ల నుండి నాకు చాలా మంచి స్పందన వచ్చింది. నేను ఒక్క బంతి కూడా వేయకముందే జ‌ట్టులో ఉన్న అనుభూతిని కలిగించినందుకు ధన్యవాదాలు. నేను ప్రతి మ్యాచ్‌ని చూస్తాను.. నా పురుషుల, మహిళల జట్లను ఉత్సాహపరుస్తాను. పునరావాసం మంచిగా జ‌రిగి వైద్యులు సంతోషంగా ఉంటే. నేను సీజన్ తర్వాత వచ్చి అందరినీ కలవాలనుకుంటున్నానని పేర్కొన్నాడు.