హే పాకిస్తాన్.. మీరు కూడా టీ20 ప్ర‌పంచ క‌ప్‌కు రాకండి.. ఏదైనా సాకు వెతుక్కోండి..!

సూర్యకుమార్ యాదవ్ నేతృత్వంలోని టీమిండియా ప్రస్తుత ప్రదర్శనను భారత మాజీ కెప్టెన్ క్రిష్ణ‌మాచారి శ్రీకాంత్ ప్రశంసిస్తూ.. పాకిస్థాన్‌ను సరదాగా హెచ్చరించాడు. భారత్‌ చేతిలో ఘోర పరాజయాన్ని నివారించడానికి పాకిస్తాన్ T20 ప్రపంచ కప్ నుండి తన పేరును ఉపసంహరించుకోవాలని శ్రీకాంత్ అన్నారు.

బంగ్లాదేశ్‌కు మద్దతుగా టీ20 ప్రపంచ కప్ నుంచి వైదొలుగుతానని పీసీబీ చైర్మన్ మొహ్సిన్ నఖ్వీ ఇటీవల బెదిరించారు. భారత్, శ్రీలంక ఆతిథ్యమిస్తున్న టీ20 ప్రపంచ కప్ ఫిబ్రవరి 7, 2026న ప్రారంభమవుతుంది.

న్యూజిలాండ్‌తో జరుగుతున్న ప్ర‌స్తుత‌ టీ20 సిరీస్‌లో భారత జట్టు బలమైన ప్రదర్శన కనబరిచింది. ఆదివారం గౌహతిలో జరిగిన మూడో టీ20లో టీం ఇండియా 10 ఓవర్లలో కేవలం రెండు వికెట్లు మాత్రమే కోల్పోయి 154 పరుగుల లక్ష్యాన్ని ఛేదించింది. తద్వారా T20 అంతర్జాతీయ క్రికెట్‌లో 150 పరుగులకు పైగా లక్ష్యాన్ని వేగంగా ఛేదించిన రెండవ జట్టుగా భార‌త్ నిలిచింది. ఈ గెలుపుతో ఐదు మ్యాచ్‌ల T20I సిరీస్‌లో టీమిండియా 3-0 ఆధిక్యాన్ని సాధించింది.

అయితే.. శ్రీకాంత్ తన యూట్యూబ్ ఛానెల్‌లో మాట్లాడుతూ.. మొన్న‌టి మ్యాచ్‌లో భారత్‌ 15 ఓవర్లలో 209 పరుగులు చేసింది. ఈ మ్యాచ్‌లో 10 ఓవర్లలో 150 పరుగులు చేశారు. ఇది చూసి, చాలా జట్లు "మేము రావడం లేదు. మీరు కప్పును ఉంచుకోండి" అని అనవచ్చు. హే పాకిస్తాన్! రావద్దు. మీ మొహ్సిన్ నఖ్వీ ఇప్పటికే దీని గురించి మాట్లాడాడు. రావద్దు.. మిమ్మ‌ల్ని కూడా బాదేస్తారు.. కొలంబోలో సిక్స్ కొట్టిన బంతి మద్రాసులో పడుతుంది. జాగ్రత్తగా ఉండండి. మీకు సరైన ఎంపిక టోర్నీకి దూరంగా ఉండటమే. ఏదైనా సాకు వెతుక్కోండి.. రాకండి. ఈ కుర్రాళ్ళు మిమ్మల్ని చావు దెబ్బతీస్తారు. ఈ ప్రదర్శన ప్రపంచంలోని ప్రతి క్రికెట్ జట్టుకు ఒక హెచ్చరిక. T20లో ఇంత దూకుడు నేను ఇంతకు ముందు ఎప్పుడూ చూడలేదని అన్నారు. టీ20 ప్రపంచ కప్‌లో పాల్గొనేందుకు ప్రభుత్వ అనుమతి కోసం ఎదురు చూస్తున్నామని ఇటీవ‌ల పీసీబీ చైర్మన్ మొహ్సిన్ నఖ్వీ అన‌గా.. అందుకు శ్రీకాంత్ ఈ కౌంట‌ర్ ఇచ్చారు.

త‌మ‌ మ్యాచ్‌లను భారత్‌లో కాకుండా శ్రీలంకలో నిర్వహించాలన్న బంగ్లాదేశ్ డిమాండ్‌కు ఐసిసి అంగీకరించకపోవడాన్ని నఖ్వీ విమర్శించారు. ఈ వివాదాల మధ్య పాకిస్తాన్ ఆదివారం నాడు 2026 T20 ప్రపంచ కప్‌కు జట్టును ప్రకటించింది. ఆ విధంగా పాకిస్తాన్ టోర్నమెంట్‌లో పాల్గొనడానికి సంసిద్ధతను తెలియజేసింది. టీ20 ప్రపంచకప్‌లో భారత్, పాకిస్తాన్ ఒకే గ్రూప్‌లో ఉండటం గమనించదగ్గ విషయం. ఈ రెండు జట్లు ఫిబ్రవరి 15న కొలంబోలో తలపడతాయి.