చిన్నస్వామి కాదు.. ఇప్పుడు ఆర్‌సీబీకి రెండు హోమ్‌గ్రౌండ్స్‌..!

IPL 2026కి ముందు RCB హోమ్ గ్రౌండ్‌కు సంబంధించిన చర్చ జోరందుకుంది. రాబోయే IPL సీజన్‌లో RCB తన హోమ్ మ్యాచ్‌లను రెండు వేదికలలో ఆడనున్న‌ట్లు తెలుస్తుంది. డిఫెండింగ్ IPL ఛాంపియన్ రాయల్ ఛాలెంజర్స్ బెంగళూరు (RCB) రాబోయే IPL 2026 సీజన్‌లో రెండు వేర్వేరు మైదానాల్లో తమ హోమ్ మ్యాచ్‌లను ఆడేందుకు సిద్ధంగా ఉందని నివేదిక‌లు చెబుతున్నాయి. RCB హోమ్ గ్రౌండ్‌ల‌లో ఒక‌టి నవీ ముంబైలో ఉండ‌గా... కొన్ని మ్యాచ్‌లు రాయ్‌పూర్‌లో కూడా జరుగ‌నున్నాయి.

IPL 2026లో బెంగళూరులోని M. చిన్నస్వామి స్టేడియంలో తన హోమ్ మ్యాచ్‌లు ఆడటానికి బదులుగా.. RCB వేరే వేదికపై ఆడటం చూడ‌వ‌చ్చు. టైమ్స్ ఆఫ్ ఇండియా నివేదిక ప్రకారం RCB హోమ్ మ్యాచ్‌లను నవీ ముంబై, రాయ్‌పూర్‌లకు మార్చవచ్చు. ఈ వార్త ఆర్‌సిబి అభిమానులకు షాక్ ఇవ్వడమే కాకుండా.. ఐపిఎల్ నిర్వహ‌ణ‌ వ్యూహంపై కూడా ప్రశ్నలను లేవనెత్తుతుంది.

చిన్నస్వామి స్టేడియం, RCB మధ్య చాలా సంవత్సరాల సంబంధం ఉంది. అయితే గత సంవత్సరం IPL 2025 ఫైనల్ మ్యాచ్‌లో RCB గెలిచిన తర్వాత చిన్నస్వామి స్టేడియం దగ్గర తొక్కిసలాట జరిగింది, ఇందులో 11 మంది అమాయకులు ప్రాణాలు కోల్పోయారు. ఇదే చిన్నస్వామి RCBకి దూరమ‌వ‌డానికి కార‌ణం.

నవీ ముంబైలోని DY పాటిల్ స్టేడియం, రాయ్‌పూర్‌లోని షహీద్ వీర్ నారాయణ్ సింగ్ ఇంటర్నేషనల్ స్టేడియం రెండూ ప్రపంచ అత్యుత్తమ సౌకర్యాలతో ప్రసిద్ధి చెందాయి. DY పాటిల్ స్టేడియంలో ఇప్పటికే అనేక విజయవంతమైన IPL మ్యాచ్‌లు జరిగాయి. ఇక్కడి పిచ్ ఎల్లప్పుడూ బ్యాట్స్‌మెన్, బౌలర్లకు ప్రయోజనకరంగా ఉంటుంది.

మరోవైపు, రాయ్‌పూర్ మైదానంలో జరిగే మ్యాచ్‌లను చూడటానికి పెద్ద సంఖ్యలో అభిమానులు స్టేడియంకు రావచ్చు. ఈ మైదానం అద్భుతమైన అవుట్‌ఫీల్డ్‌కు ప్రసిద్ధి చెందింది. ఛత్తీస్‌గఢ్ క్రికెట్ అభిమానులు చాలా కాలంగా ఐపీఎల్ ఎప్పుడు వస్తుందా అని ఎదురుచూస్తున్నారు. ఇక్కడ RCB తన మ్యాచ్‌లు ఆడితే, వారి ఆనందానికి అవ‌ధులు ఉండ‌వు.

RCB ఫ్రాంచైజీ మాత్ర‌మే కాదు.. రాజస్థాన్ రాయల్స్ కూడా పూణెలోని MCA స్టేడియంలో తమ మ్యాచ్‌లను ఆడనుంది. జైపూర్‌లోని క్రికెట్ అడ్మినిస్ట్రేటివ్ బాడీ అధికారులతో ఐపీఎల్ ఫ్రాంచైజీకి విభేదాలు ఉన్నాయి. అటువంటి పరిస్థితిలో రెండు జట్లు రాబోయే ఐపిఎల్ సీజన్‌కు ముందు కొత్త హోమ్‌గ్రౌండ్‌ను పొంద‌నున్నాయి.