స్వ‌ర్ణంతో 'నీరజ్ చోప్రా' బలమైన పునరాగమనం..!

రెండుసార్లు ఒలింపిక్ పతక విజేత, భారత జావెలిన్ త్రోయర్ నీరజ్ చోప్రా దక్షిణాఫ్రికాలోని పోట్చెఫ్‌స్ట్రూమ్‌లో పాట్స్ ఇన్విటేషనల్ ట్రాక్ ఈవెంట్‌ను గెలుచుకొని సీజన్‌ను గొప్పగా ప్రారంభించాడు. బుధవారం జరిగిన వరల్డ్ అథ్లెటిక్స్ కాంటినెంటల్ టూర్ ఛాలెంజర్ పోటీలో నీరజ్ 84.52 మీటర్ల దూరం జావెలిన్ విసిరి ఆరుగురు ఆటగాళ్ల మధ్య జరిగిన పోటీలో అగ్రస్థానాన్ని కైవసం చేసుకున్నాడు.

భారత స్టార్ నీరజ్ 82.44 మీటర్లు విసిరిన దక్షిణాఫ్రికాకు చెందిన 25 ఏళ్ల డౌ స్మిత్ కంటే ముందు నిలిచాడు. అయితే నీరజ్ ప్రదర్శన అతని వ్యక్తిగత అత్యుత్తమ 89.94 మీటర్ల కంటే తక్కువగా ఉండగా.. స్మిత్ తన వ్యక్తిగత అత్యుత్తమ 83.29 మీటర్లకు చేరువయ్యాడు. ఈ పోటీలో ఇద్దరు ఆటగాళ్లు నీరజ్, స్మిత్ మాత్రమే 80 మీటర్ల దూరాన్ని దాటారు. మరో దక్షిణాఫ్రికా ఆటగాడు డంకన్ రాబర్ట్‌సన్ 71.22 మీటర్లు విసిరి మూడో స్థానంలో నిలిచాడు.

నీరజ్ తన కొత్త కోచ్ చెక్ రిపబ్లిక్‌కు చెందిన జాన్ జెలెజ్నీ పర్యవేక్షణలో పోచెఫ్‌స్ట్రూమ్‌లో ప్రాక్టీస్ చేస్తున్నాడు. జెలెజ్నీ మూడుసార్లు ఒలింపిక్ ఛాంపియన్, ప్రపంచ రికార్డ్ హోల్డర్. 27 ఏళ్ల నీరజ్ తన దీర్ఘకాల కోచ్ జర్మనీకి చెందిన క్లాస్ బార్టోవిట్జ్‌తో గత ఏడాది విడిపోయాడు.

2020 టోక్యో (స్వర్ణం), 2024 పారిస్ (రజతం) ఒలింపిక్ క్రీడలలో నీరజ్ వరుసగా రెండు పతకాలను గెలుచుకున్నాడు. నీరజ్ 2022లో సాధించిన 89.94 మీటర్ల వ్యక్తిగత అత్యుత్తమ ప్రదర్శన చేశాడు.. 90 మీటర్ల మార్కును తాకాలని చాలా కాలంగా ప్రయత్నిస్తున్నాడు.

జెలెజ్నీ మార్గదర్శకత్వంలో నీరజ్ తన విజయాల రికార్డును వేరే స్థాయికి తీసుకెళ్లడానికి ప్రయత్నిస్తున్నాడు. 1992, 1996, 2000 ఒలింపిక్ క్రీడలలో స్వర్ణ పతక విజేత అయిన జెలెజ్నీ, ఆల్ టైమ్‌లోని టాప్ టెన్ బెస్ట్ త్రోలలో ఐదు రికార్డులు కలిగి ఉన్నాడు. 1996లో జర్మనీలో 98.48 మీటర్లు విసిరి ప్రపంచ రికార్డు నెలకొల్పాడు. నాలుగు పర్యాయాలు ప్రపంచ రికార్డును బద్దలు కొట్టాడు.