అసలే ఓటమి.. రోహిత్ శర్మకు ఇంకో షాక్

ముంబయి ఇండియన్స్ జట్టును బ్రాబౌర్న్ స్టేడియంలో ఢిల్లీ క్యాపిటల్స్ ఓడించింది. ఢిల్లీని లోయర్ ఆర్డర్ బ్యాట్స్మెన్ గెలిపించారు. 4 వికెట్ల తేడాతో ముంబయి జట్టుని ఢిల్లీ ఓడించింది. ముంబయి ఇచ్చిన 178 పరుగుల లక్ష్యాన్ని ఢిల్లీ 18.2 ఓవర్లలో 6 వికెట్లు కోల్పోయి ఛేదించింది. ఓ దశలో 72 పరుగులకే 5 వికెట్లు కోల్పోగా, లలిత్ యాదవ్ (48 నాటౌట్), శార్దూల్ ఠాకూర్ (11 బంతుల్లో 22), అక్షర్ పటేల్ (17 బంతుల్లో 38 నాటౌట్) రాణించడంతో ఢిల్లీ గెలిచింది. అక్షర్ పటేల్ ఆఖర్లో 2 ఫోర్లు, 3 సిక్సర్లతో చెలరేగడంతో మరో 10 బంతులు మిగిలుండగానే ఢిల్లీ విజయం సాధించింది. ముంబయి బౌలర్ డానియల్ సామ్స్ వేసిన 18వ ఓవర్లో ఢిల్లీ జట్టు 24 పరుగులు సాధించింది.

అంతకుముందు ముంబయి జట్టు తొలుత బ్యాటింగ్ చేసి 20 ఓవర్లలో 5 వికెట్లకు 177 పరుగులు చేసింది. టాస్ ఓడిన ముంబయి బ్యాటింగ్ కు దిగగా ఓపెనర్ ఇషాన్ కిషన్ మొత్తం 48 బంతులు ఎదుర్కొని 81 పరుగులు సాధించాడు. అతడి స్కోరులో 11 ఫోర్లు, 2 సిక్సులు ఉన్నాయి. కెప్టెన్ రోహిత్ శర్మ 32 బంతుల్లో 4 ఫోర్లు, 2 సిక్సులతో 41 పరుగులు చేశాడు. అన్మోల్ ప్రీత్ సింగ్ 8, తిలక్ వర్మ 22, కీరన్ పొలార్డ్ 3, టిమ్ డేవిడ్ 12 పరుగులు చేశారు. డేనియల్ శామ్స్ 7 పరుగులతో అజేయంగా నిలిచాడు. ఢిల్లీ క్యాపిటల్స్ బౌలర్లలో కుల్దీప్ యాదవ్ 3, ఖలీల్ అహ్మద్ 2 వికెట్లు తీశారు.

ముంబై ఇండియన్స్‌కు మరో షాక్ తగిలింది. స్లో ఓవర్ రేట్ కారణంగా ఆ జట్టు కెప్టెన్ రోహిత్ శర్మకు ఐపీఎల్ నిర్వాహకులు రూ. 12 లక్షల జరిమానా విధించారు. ముంబై నిర్దిష్ట సమయంలో తన బౌలింగ్ కోటా పూర్తి చేయలేకపోవడంతో ఈ జరిమానా విధించారు. ఫలితంగా ఈ సీజన్‌లో స్లో ఓవర్ రేట్ జరిమానా ఎదుర్కొన్న తొలి కెప్టెన్‌గా రోహిత్ రికార్డులకెక్కాడు. ప్రణాళిక ప్రకారం బౌలింగ్ చేయలేకపోవడమే తమ ఓటమికి కారణమన్నాడు.