'ఎంఎస్ ధోనీ తప్పుడు కారణాల వల్ల సీఎస్‌కేలో ఉన్నాడు'.. ఏబీ డివిలియర్స్

ప్రస్తుతం 44 ఏళ్ల వయసున్న ఎంఎస్ ధోనీ ఐపీఎల్‌లో చెన్నై సూపర్ కింగ్స్ తరఫున ఆడుతున్నాడు. గత కొన్ని ఐపీఎల్ సీజన్లలో ధోని పాత్ర పరిమితమైంది. అతను వికెట్ కీపింగ్ బాధ్యతలను చక్కగా నిర్వర్తిస్తున్నప్పటికీ, అతని బ్యాటింగ్ పాత్ర తగ్గిపోయింది. అతడు బ్యాటింగ్ ఆర్డర్‌లో దిగువన వ‌స్తాడు, తరచుగా ఒకటి లేదా రెండు ఓవర్లు మాత్రమే ఆడతాడు. ఐపీఎల్ 19వ సీజన్‌లో ధోనీ సీఎస్‌కే తరఫున ఆడటాన్ని చూడటానికి అభిమానులు ఆసక్తిగా ఎదురుచూస్తున్నారు. ఇదిలా ఉండగా.. ఐపీఎల్‌లో చాలా కాలం పాటు ఆర్‌సీబీ తరఫున ఆడిన దక్షిణాఫ్రికా దిగ్గజం ఏబీ డివిలియర్స్, ధోనీ చివరిలో బ్యాటింగ్ చేయడాన్ని ప్రశ్నించారు.

ఎంఎస్ ధోనీ 8వ లేదా 9వ స్థానంలో బ్యాటింగ్ చేస్తూ సరిగ్గా రాణించకపోవడంలో నాకు ఆయ‌న పాత్ర కనిపించడం లేదు. ఒకవేళ ఆయ‌న‌ 8వ లేదా 9వ స్థానంలో బ్యాటింగ్ చేస్తూ.. కెప్టెన్సీ చేయకపోతే.. అతను దాదాపుగా తనకంటూ ఒక ప్రత్యేక స్థానాన్ని సృష్టించుకుంటున్నాడని, తప్పుడు కారణాల వల్ల జట్టులో ఉంటున్నాడని నేను అనుకుంటున్నాను. అది అతనికి తగిన స్థానం కాదు. ధోనీ స్వయంగా ఆరో స్థానంలో బ్యాటింగ్ చేయాలి. నేను అతన్ని ఐదో స్థానంలో లేదా అప్పుడప్పుడు నాలుగో స్థానంలో చూడాలనుకుంటున్నానని వ్యాఖ్యానించాడు.

ధోనీకి ఇదే చివరి సీజన్ కావచ్చని అతని మాజీ భారత క్రికెట‌ర్‌, సీఎస్కే సహచరుడు రాబిన్ ఉతప్ప అభిప్రాయపడ్డాడు. మరోవైపు, చెన్నై సూపర్ కింగ్స్ (సీఎస్కే)లోని రాబోయే తరం ఆటగాళ్లకు, ఈ సీనియర్ వికెట్ కీపర్-బ్యాట్స్‌మన్ అనుభవాన్ని చూసి, నేర్చుకోవడం ద్వారా ఎదగడానికి ఒక సువర్ణావకాశం లభించిందని మాజీ భారత ఆల్-రౌండర్ ఇర్ఫాన్ పఠాన్ అభిప్రాయపడ్డాడు.