కెప్టెన్సీ విష‌య‌మై విమర్శకులకు గట్టి సమాధానం ఇచ్చిన బెన్ స్టోక్స్..!

గడిచిన మూడు నెలలు తనకు చాలా సవాలుగా ఉన్నాయని ఇంగ్లండ్ టెస్ట్ కెప్టెన్ బెన్ స్టోక్స్ అంగీకరించాడు. ఆస్ట్రేలియా చేతిలో 1-4 తేడాతో యాషెస్ సిరీస్‌లో ఇంగ్లండ్ నిరాశాజనకంగా ఓడిపోయింది. స్టోక్స్ సారథ్యంలోని ఇంగ్లండ్ జ‌ట్టుకు ఈ సిరీస్ నిరాశాజనకంగా నిలిచింది.

బెన్ స్టోక్స్ తన పేలవ ప్రదర్శన కారణంగా తీవ్ర విమర్శలను ఎదుర్కొన్నాడు, దీంతో అతడిని కెప్టెన్సీ నుంచి తొలగించాలనే సూచనలు కూడా వచ్చాయి. అయితే.. స్టోక్స్ ఇంగ్లాండ్ జట్టు పట్ల తన అంకితభావం గురించి మాట్లాడుతూ ఈ విమర్శకులకు సమాధానమిచ్చాడు.

తాను ఇంగ్లండ్‌కు కెప్టెన్‌గా వ్యవహరించడంపైనే దృష్టి సారించానని, ఇంగ్లండ్ అండ్ వేల్స్ క్రికెట్ బోర్డ్ (ECB), హెడ్ కోచ్ బ్రెండన్ మెక్కల్లమ్, మేనేజింగ్ డైరెక్టర్ రాబ్ కీల మద్దతు తనకు ఉందని స్టోక్స్ చెప్పాడు. యాషెస్ సిరీస్ సమయంలో కెప్టెన్సీ భారంపై తన భావాలను వ్యక్తం చేస్తూ స్టోక్స్ ఇన్‌స్టాగ్రామ్‌లో ఒక పోస్ట్ పెట్టాడు.

ఇంగ్లండ్ కెప్టెన్‌గా ఉండటం ఏ ఆటగాడికైనా గొప్ప గౌరవం, నేను దానిని తేలికగా తీసుకోను. కెప్టెన్సీలో మంచి చెడు సమయాలు ఉంటాయి. అది మిమ్మల్ని నవ్విస్తుంది, ఏడిపిస్తుంది. అది మిమ్మల్ని పూర్తిగా ఆకర్షిస్తుంది, కొన్నిసార్లు జీవితంలో మీకు ఉన్నది అదొక్కటే అనిపిస్తుంది. నా కెప్టెన్సీ ప్రయాణంలో గడిచిన మూడు నెలలు నిస్సందేహంగా అత్యంత సవాలుతో కూడిన సమయం. ఇది నన్ను అనేక విధాలుగా పరీక్షించింది, ప్రతి కెప్టెన్ కూడా ఇలాంటి సమయాలను ఎదుర్కొంటాడని నేను ఖచ్చితంగా చెప్పగలను. ఈ జట్టును ముందుకు తీసుకెళ్లాలనే తపన, కోరిక మెక్‌కల్లమ్, రాబ్ కీ, నాకు ఉన్నాయి. మా శక్తియుక్తులన్నీ ఒడ్డి పోరాడాలనుకుంటున్నాము. ఈ ప్రయాణంలో మేము తప్పులు చేశామని, వాటి నుండి పాఠాలు నేర్చుకున్నామని మాకు తెలుసు. విజయం కంటే వైఫల్యం నుంచే ఎక్కువగా నేర్చుకుంటాం. నేను నా గురించి తెలుసుకున్నాను, కానీ అన్నింటికన్నా ముఖ్యంగా, అభిమానులు ఈ విషయాన్ని అర్థం చేసుకోవాలని నేను కోరుకుంటున్నానని పోస్టు చేశాడు.