డ‌బ్ల్యూటీసీ ఫైనల్లో కేఎల్ రాహుల్ స్థానంలో ఆడే డాషింగ్ బ్యాట్స్‌మెన్ ఎవ‌రో తెలుసా..?

టీమిండియా ఓపెనర్ కేఎల్ రాహుల్ గాయం కారణంగా ప్రపంచ టెస్టు ఛాంపియన్‌షిప్ ఫైనల్‌కు దూరమయ్యాడు. రాహుల్ స్థానంలో ఇషాన్ కిషన్‌ను జట్టులోకి తీసుకున్నారు. అదే సమయంలో రుతురాజ్ గైక్వాడ్, సూర్యకుమార్ యాదవ్, ముఖేష్ కుమార్‌లను స్టాండ్‌బై ప్లేయర్‌లుగా ఉంచారు. ఈ మేరకు బీసీసీఐ ట్వీట్ ద్వారా సమాచారం ఇచ్చింది.

ఐపీఎల్ మ్యాచ్‌లో ఫీల్డింగ్ చేస్తుండ‌గా రాహుల్ కుడి తొడకు గాయమైంది. దీని కారణంగా రాహుల్ డ‌బ్ల్యూటీసీ ఫైనల్ నుండి తప్పుకోవాల్సి వచ్చింది. రాహుల్‌కి శస్త్ర చికిత్స చేయాల్సి ఉంటుంది. రాహుల్ స్థానంలో ఇషాన్ కిషన్ భారత జట్టులోకి వచ్చాడు. బంగ్లాదేశ్‌తో జరిగిన టెస్టు సిరీస్‌లో ఇషాన్‌ను భారత జట్టులో చేర్చారు. కానీ అతను ప్లేయింగ్ XIలో అవకాశం పొందలేకపోయాడు.

ఇషాన్ కిషన్‌తో పాటు సూర్యకుమార్ యాదవ్, ముఖేష్ కుమార్, రుతురాజ్ గైక్వాడ్‌లను కూడా స్టాండ్‌బై ప్లేయర్‌లుగా జట్టులో ఉంచారు. సూర్యకుమార్ ఆస్ట్రేలియాతో జ‌రిగిన‌ బోర్డర్ గవాస్కర్ ట్రోఫీలో అరంగేట్రం చేశాడు. కానీ అతను 8 పరుగులు మాత్రమే చేయగలిగాడు. రుతురాజ్ గైక్వాడ్ ఐపీఎల్ 2023లో తన అద్భుతమైన ఫామ్‌కు ప్ర‌మోష‌న్‌ అందుకున్నాడు. ప్రపంచ టెస్టు ఛాంపియన్‌షిప్‌లో భారత్, ఆస్ట్రేలియా మధ్య జూన్ 7 నుంచి ఓవల్‌లో చివరి మ్యాచ్ జరగనుంది.

ఇషాన్ కిషన్ ఇండియన్ ప్రీమియర్ లీగ్ 16వ సీజన్‌లో ఆడిన 10 మ్యాచ్‌ల్లో 136 స్ట్రైక్ రేట్‌తో 293 పరుగులు చేశాడు. ముంబై ఇండియన్స్ తరఫున ఆడుతున్న ఇషాన్.. ఈ సీజన్‌లో కేవలం రెండు అర్ధ సెంచరీలు మాత్రమే చేశాడు.