72 మంది ఆటగాళ్లు సేల్‌.. ఆ 'ఆల్‌రౌండ‌ర్' మాత్రం న‌క్క తోక తొక్కుంటాడు..!
మిచెల్ స్టార్క్, పాట్ కమిన్స్, సామ్ కుర్రాన్, క్రిస్ మోరిస్ ఒకప్పుడు IPL వేలంలో అత్యంత ఖరీదైన విదేశీ ఆటగాళ్ళు.
By Medi Samrat Published on 25 Nov 2024 2:05 AM GMT
మిచెల్ స్టార్క్, పాట్ కమిన్స్, సామ్ కుర్రాన్, క్రిస్ మోరిస్ ఒకప్పుడు IPL వేలంలో అత్యంత ఖరీదైన విదేశీ ఆటగాళ్ళు. IPL 2025 సీజ‌న్ కోసం జెడ్డాలో జరిగిన మొదటి రోజు వేలంలో ఈసారి ఫ్రాంచైజీలు స్థానిక ఆటగాళ్లపై విశ్వాసం వ్యక్తం చేసి.. వారిపై మాత్రమే పెద్ద మొత్తంలో పందెం వేశాయి.
IPL 2025 మెగా వేలం మొదటి రోజున, రిషబ్ పంత్, శ్రేయాస్ అయ్యర్, అర్ష్‌దీప్ వంటి ఆటగాళ్లపై పెద్ద బిడ్‌లు వేయడం ఖాయం అని ఇప్పటికే భావించారు. అయితే వెంకటేష్ అయ్యర్ కోసం మాత్రం కోల్‌కతా నైట్ రైడర్స్ రూ. 23.75 కోట్లు వెచ్చించింది. కోల్‌కతా తరఫున ఆడుతున్న వెంకటేష్‌ను వేలానికి ముందు జట్టు ఉంచుకోలేదు.. అయితే ఈ ఆల్‌రౌండర్‌ను తిరిగి పొందడానికి అది తన ఖజానాలోని భారీ మొత్తాన్నికేటాయించింది. ఇంతకుముందు వెంకటేష్ కేవలం రూ.8 కోట్లతో కేకేఆర్ కోసం మూడు సీజన్లు ఆడాడు. ఈ దెబ్బ‌తో వెంక‌టేశ్ అయ్యర్ జాత‌క‌మే మారిపోనుంది. వెంకటేష్ అయ్యర్ మాత్రమే కాదు.. ఇతర జట్లు కూడా భారతీయ ఆటగాళ్లపై పెద్ద మొత్తం పందెం వేశాయి.
ఆదివారం జరిగిన వేలంలో అత్యంత ఖరీదైన ఆట‌గాళ్లలో టాప్ 10లో ఏడుగురు భారతీయులు ఉన్నారు. ఐపీఎల్ వేలంలో అత్యధిక పర్స్‌తో వచ్చిన పంజాబ్ కింగ్స్, రాజస్థాన్ రాయల్స్ మాజీ స్పిన్నర్ యుజ్వేంద్ర సింగ్ చాహల్‌పై 18 కోట్ల రూపాయల పందెం వేసింది.
ఢిల్లీ క్యాపిటల్స్ రూ.14 కోట్లకు కేఎల్ రాహుల్‌ను కొనుగోలు చేయగా.. సిరాజ్‌ను రూ.12 కోట్లకు పైగా గుజరాత్ టైటాన్స్ కొనుగోలు చేసింది. గాయం కారణంగా గత సీజన్‌లో ఆడని మహ్మద్ షమీని సన్‌రైజర్స్ హైదరాబాద్ 10 కోట్ల రూపాయలకు కొనుగోలు చేసింది. ఇది కాకుండా.. చాలా మంది యువ అన్‌క్యాప్డ్ ఇండియన్ ప్లేయర్‌లు వేలంలో కోట్ల రూపాయలు ప‌లికారు.
పాంటింగ్, శ్రేయాస్ గతంలో ఢిల్లీ క్యాపిటల్స్‌లో కలిసి పనిచేశారు. IPL 2025 మరోసారి శ్రేయాస్ అయ్యర్, రికీ పాంటింగ్‌ల సహకారాన్ని చూస్తుంది. వేలంలో పంజాబ్ కొత్త కోచ్ పాంటింగ్ వ్యూహం చాలా స్పష్టంగా ఉంది. శ్రేయాస్ పేరు వచ్చిన వెంటనే.. పంజాబ్ మొదటి నుండి శ్రేయాస్‌పై వేలం కొనసాగించింది. పంజాబ్ కెప్టెన్ కోసం వెతుకుతోంది. పాంటింగ్ కొత్త కెప్టెన్ కోసం రూ. 26.75 కోట్లు ఖర్చు చేసింది. మెగా వేలం ప్రారంభానికి ముందు రిషబ్ పంత్‌ను విడుదల చేసిన తర్వాత ఢిల్లీ పూర్తిగా శ్రేయాస్ అయ్యర్‌ను తీసుకోవడంపై దృష్టి పెట్టింది. అయితే పంజాబ్ కింగ్స్ వారికి అడ్డుప‌డింది.
శ్రేయాస్ వేలంలో అమ్ముడ‌వ‌టంతో ఢిల్లీ పంత్‌కు 20.75 కోట్లకు RTM పెట్టగా.. ఇక్కడ లక్నో నేరుగా రూ.27 కోట్లకు బిడ్‌ వేసి ఢిల్లీ చేతిలోనుంచి పంత్‌ను లాగేసుకుంది. అయితే దీని తర్వాత ఢిల్లీ కేఎల్ రాహుల్‌ను రూ.14 కోట్లకు కొనుగోలు చేసింది. దీంతో కెప్టెన్ కోసం ఢిల్లీ అన్వేషణ కూడా పూర్తయింది.
1574 మంది ఆటగాళ్లు వేలానికి నామినేట్ అయ్యారు. 577 మంది ఆటగాళ్లు తుది జాబితాలో చోటు దక్కించుకున్నారు. తొలిరోజు మొత్తం 72 మంది ఆటగాళ్లు అమ్ముడుపోయారు. ఇందులో 24 మంది విదేశీ ఆటగాళ్లు ఉన్నారు. అన్ని ఫ్రాంచైజీలు మొత్తం రూ.467.95 కోట్లు వెచ్చించాయి. రెండో రోజు మిగిలిన ఆటగాళ్లకు బిడ్డింగ్ నిర్వహిస్తారు.
