పాక్‌పై టీమిండియా ఘ‌న విజ‌యం.. మ్యాచ్ త‌ర్వాత 'హ్యాండ్‌షేక్' కూడా..

శ్రీలంకలో భారత్‌, పాకిస్తాన్‌ దృష్టి లోపం ఉన్న మహిళా క్రికెట్ క్రీడాకారిణుల మ్యాచ్‌ ఆదివారం జ‌రిగింది. అయితే మ్యాచ్ ముగిసిన త‌ర్వాత రెండు దేశాల క్రీడాకారిణులు ఒకరితో ఒకరు కరచాలనం చేసి అందరినీ ఆశ్చర్యపరిచారు. వారు రెండు దేశాల మధ్య రాజకీయ ఉద్రిక్తతలను విడిచిపెట్టారు. టోర్నీ నిర్వాహకులు తెలిపిన వివరాల ప్రకారం.. ఇది ప్రపంచంలోనే తొలి దృష్టి లోపం ఉన్న మహిళల టీ20 మ్యాచ్. వారు ప్ర‌పంచాన్ని చూడలేకపోయినా క్రీడాస్ఫూర్తిని, పరస్పర గౌరవాన్ని చాటుకోవడంలో ఇరు దేశాల ఆటగాళ్లు సఫలమయ్యారు.

మే నెలలో రెండు దేశాల మధ్య యుద్ధం మొదలైనప్పటి వైరం పెరిగింది. సెప్టెంబరులో జరిగిన ఆసియా కప్‌లో భారత పురుషుల జట్టు పాకిస్తాన్ ఆటగాళ్లతో కరచాలనం చేయడానికి నిరాకరించింది. అప్పటి నుండి పరిస్థితి మెరుగుపడలేదు. ఇటీవల జరిగిన వన్డే ప్రపంచకప్‌లో పాకిస్థాన్ ఆటగాళ్లతో కరచాలనం చేసేందుకు నిరాకరించిన మహిళా జట్లకు కూడా ఈ టెన్షన్ చేరింది. ఆదివారం దోహా వేదికగా జరిగిన ఎమర్జింగ్ ఆసియా కప్‌లో కూడా భారత్-ఏ, పాకిస్థాన్-ఏ జట్ల ఆటగాళ్లు చేతులు క‌ల‌ప‌లేదు. ఈ మ్యాచ్‌లో భారత్‌ ఓటమి పాలైంది.

అయితే, మ్యాచ్ తర్వాత దృష్టిలోపం ఉన్న భారత జట్టు కూడా పాక్ జట్టుతో కరచాలనం చేయదని అంతా అనుకున్నారు. టాస్ తర్వాత కరచాలనం జరగకపోవడంతో అలానే అనిపించింది. అయితే మ్యాచ్ ముగిసిన వెంటనే మ్యాటర్ పూర్తిగా మారిపోయింది. ఇరు జట్లు ఒకరినొకరు ఆప్యాయంగా పలకరించుకున్నారు.

ఆసక్తికరమైన విషయమేమిటంటే.. ఇరు జట్లు ఒకే బస్సులో మైదానానికి చేరుకోవ‌డ‌మేకాకుండా.. మ్యాచ్ ముగిసిన తర్వాత కరచాలనం చేసుకుని.. ఒకరినొకరు ముక్తకంఠంతో ప్రశంసించుకున్నారు. కాట్నాయక్‌లోని ఫ్రీ ట్రేడ్ జోన్ మైదానంలో జరిగిన మ్యాచ్‌లో పాకిస్థాన్ 20 ఓవర్లలో ఎనిమిది వికెట్లకు 135 పరుగులు చేసింది. అనంతరం భారత్‌ కేవలం 10.2 ఓవర్లలో లక్ష్యాన్ని ఛేదించి ఎనిమిది వికెట్ల తేడాతో విజయం సాధించింది.

పాక్ కెప్టెన్ నిమ్రా రఫీక్ అద్భుతమైన విజయం సాధించినందుకు భారత్‌ను అభినందించగా, భారత కెప్టెన్ టిసి దీపిక కూడా పాకిస్తాన్ ఆటను ప్రశంసించింది. మీడియాతో మాట్లాడేందుకు ఆటగాళ్లను అనుమతించనప్పటికీ, ఇరు జట్లు ఒకరినొకరు బిగ్గరగా ఉత్సాహపరిచారు.