ప్రపంచ కప్ ముందు బ్యాట్స్‌మెన్‌ బ్యాట్ ఇరగ్గొట్టిన పాక్ బౌలర్

ప్రపంచ కప్ కు సమయం దగ్గరపడుతూ ఉంది. అన్ని జట్లూ సమాయత్తమవుతూ ఉన్నాయి. ప్రపంచ కప్ ముందు పాక్ పేసర్ కివీస్ ఆటగాడి బ్యాట్ ను విరగ్గొట్టడం ఇప్పుడు హాట్ టాపిక్ గా మారింది. బంగ్లాదేశ్‌-పాక్-న్యూజిలాండ్ T20I ముక్కోణపు సిరీస్‌ ఆడాయి. ఈ సిరీస్ ను పాకిస్థాన్ గెలుచుకుంది. ఫైనల్‌లో ఆతిథ్య న్యూజిలాండ్‌ను పాక్ ఓడించింది. అక్టోబర్ 14, 2022న క్రైస్ట్‌చర్చ్‌లో ఫైనల్ మ్యాచ్ జరిగింది, ఈ మ్యాచ్‌లో పాకిస్థాన్ 5 వికెట్ల తేడాతో గెలిచింది. పాక్ టాస్ గెలిచి ముందుగా బౌలింగ్ ఎంచుకుంది. కేన్ విలియమ్సన్ 59 పరుగులతో అత్యధిక స్కోరు చేయడంతో న్యూజిలాండ్‌ను 163/7కి పరిమితం చేసింది. మహ్మద్ నవాజ్ 38*, మహ్మద్ రిజ్వాన్ 34 రాణించడంతో పాకిస్తాన్‌ ఇంకా 3 బంతులు మిగిలి ఉండగానే విజయాన్ని అందుకుంది.

పాక్ బౌలర్లలో హరీస్ రవూఫ్ మంచి స్పెల్ వేశాడు. తన 4 ఓవర్ల స్పెల్‌లో 2/22 తో రాణించాడు. ఆ స్పెల్ సమయంలో ఎంతో స్పీడ్ గా బౌలింగ్ వేశాడు. కివీ బ్యాటర్లను తన పేస్‌తో ఇబ్బంది పెట్టాడు. ఆ పేస్ గ్లెన్ ఫిలిప్స్ ను ఇబ్బంది పెట్టడమే కాదు.. అతడి బ్యాట్ కూడా విరిగిపోయింది. న్యూజిలాండ్ ఇన్నింగ్స్ ఆరో ఓవర్ నాల్గవ బంతికి రౌఫ్ గ్లెన్ ఫిలిప్స్ బ్యాట్ విరిగిపోయేంత పేస్ తో బౌలింగ్ వేసాడు. ఆ వీడియో సోషల్ మీడియాలో వైరల్ అవుతూ ఉంది.