రాహుల్ క‌ష్ట‌మే.. ఢిల్లీ క్యాపిటల్స్ కెప్టెన్ రేసులో ముందున్న స్టార్ ఆల్‌రౌండ‌ర్‌..!

ఛాంపియన్స్ ట్రోఫీ ముగియగా టైటిల్ గెలిచిన భారత ఆటగాళ్లు స్వదేశానికి చేరుకున్నారు. ఇప్పుడు అందరి దృష్టి మార్చి 22 నుండి ప్రారంభ‌మ‌య్యే IPL 2025 పైనే ఉంది. ఛాంపియన్స్ ట్రోఫీలో భారత ఆటగాళ్లు కలిసి ఆడి జట్టును చాంపియన్‌గా నిలబెట్టగా.. ఇప్పుడు ఆటగాళ్లంతా తమ తమ ఐపీఎల్ జట్లకు ఆడ‌నున్నారు. గత సీజన్‌తో పోలిస్తే ఈసారి జట్లు కొత్తగా కనిపించనున్నాయి. కొన్ని జట్లకు కొత్త కెప్టెన్లు కూడా వచ్చారు. కానీ ఇప్పటి వరకు ఢిల్లీ క్యాపిటల్స్ కెప్టెన్‌ను ప్రకటించలేదు. గత సీజన్ వరకు ఢిల్లీ కెప్టెన్సీని రిషబ్ పంత్ నిర్వహించాడు, అతడు ఇప్పుడు లక్నో సూపర్ జెయింట్స్ కెప్టెన్ అయ్యాడు.

భారత జట్టులోని ఇద్దరు ముఖ్యమైన సభ్యులు ఆల్ రౌండర్ అక్షర్ పటేల్, వికెట్ కీపర్ బ్యాట్స్‌మెన్ KL రాహుల్ ఢిల్లీ కెప్టెన్సీకి ప్ర‌ధాన‌ పోటీదారులు. రాహుల్ గత సీజన్ వరకు లక్నో సూపర్ జెయింట్స్‌కు నాయకత్వం వహించగా, ఈసారి ఢిల్లీకి ఆడనున్నాడు. IPL 2025 ప్రారంభానికి ఎక్కువ సమయం లేదు. దీంతో ఢిల్లీ ఫ్రాంచైజీ కొత్త కెప్టెన్ పేరును రాబోయే రెండు, మూడు రోజుల్లో ప్రకటించవచ్చని ప్ర‌చారం జ‌రుగుతుంది.

ఢిల్లీ క్యాపిటల్స్ త‌మ‌ మొదటి రెండు మ్యాచ్‌ల కోసం విశాఖపట్నం వెళ్లే ముందు ఢిల్లీలో శిక్షణ శిబిరాన్ని నిర్వహిస్తుంది. అక్షర్, రాహుల్, కుల్దీప్ యాదవ్, దక్షిణాఫ్రికాకు చెందిన ట్రిస్టన్ స్టబ్స్, ఆస్ట్రేలియా ఆటగాళ్లు జేక్ ఫ్రేజర్ మెక్‌గర్క్, మిచెల్ స్టార్క్‌లు మార్చి 17, 18 తేదీల్లో విశాఖపట్నంలో సమావేశమవుతారు. రాహుల్‌ భార్య అతియా శెట్టి గర్భవతి అయినందున ఒకటి లేదా రెండు మ్యాచ్‌లు ఆడకపోవచ్చు. అది వారి మొదటి బిడ్డ పుట్టిన తేదీపై ఆధారపడి ఉంటుంది.

31 ఏళ్ల అక్ష‌ర్ ఢిల్లీ క్యాపిటల్స్‌తో తన ఏడవ సీజన్ ఆడుతున్నందున‌ రాహుల్ కంటే అక్ష‌ర్‌కే జట్టును నడిపించే బాధ్య‌త‌ను అప్ప‌గించ‌నున్న‌ట్లు తెలుస్తుంది. రాహుల్ తొలిసారిగా ఢిల్లీ జట్టులో చేరనున్నాడు. అక్షర్ 150 IPL గేమ్‌లు ఆడాడు. 131 స్ట్రైక్ రేట్‌తో 1,653 పరుగులు చేశాడు. 7.28 ఎకానమీ రేట్‌తో 123 వికెట్లు తీశాడు. అయితే, రాహుల్ గత కొన్నేళ్లుగా ఐపీఎల్ కెప్టెన్‌గా ఉన్నాడు. గతంలో పంజాబ్ కింగ్స్, లక్నో సూపర్ జెయింట్‌లకు నాయకత్వం వహించాడు.

రాహుల్ పదవీకాలంలో లక్నో జట్టు రెండుసార్లు ప్లేఆఫ్‌లకు చేరుకుంది.. అయితే రాహుల్‌ ఈ సీజన్లలో చాలా వరకు గాయపడ్డాడు. ఏప్రిల్ 18న 33వ ఏట అడుగుపెట్టనున్న రాహుల్ 132 మ్యాచ్‌ల్లో 134 కంటే ఎక్కువ స్ట్రైక్ రేట్‌తో 4,683 పరుగులు చేశాడు. నాలుగు సెంచరీలు కూడా చేశాడు.