Video : గ్రౌండ్‌లో ఆట‌గాళ్ల గొడ‌వ.. స్టాండ్స్‌లో అభిమానుల ముష్టి యుద్ధం..!
ఆదివారం అరుణ్ జైట్లీ స్టేడియంలో ఢిల్లీ క్యాపిటల్స్, ముంబై ఇండియన్స్ మధ్య జరిగిన మ్యాచ్ వివాదాలతో నిండిపోయింది.
By Medi Samrat
ఆదివారం అరుణ్ జైట్లీ స్టేడియంలో ఢిల్లీ క్యాపిటల్స్, ముంబై ఇండియన్స్ మధ్య జరిగిన మ్యాచ్ వివాదాలతో నిండిపోయింది. మ్యాచ్ సందర్భంగా జస్ప్రీత్ బుమ్రా, కరుణ్ నాయర్ మధ్య మాటల యుద్ధం జరిగింది. ఇది కాకుండా సోషల్ మీడియాలో ఒక వీడియో వైరల్ అయ్యింది. దీనిలో స్టాండ్‌లో ఉన్న ప్రేక్షకుల మధ్య భీకర పోరాటం జరిగింది. ఓ మహిళ ఓ వ్యక్తిని తీవ్రంగా కొట్టడం వీడియోలో కనిపించింది. కొంతమంది పొరుగువారు ఇద్ద‌రినీ వేరు చేయడం ద్వారా పరిస్థితిని నియంత్రించారు.
48 సెకన్ల వీడియో క్లిప్‌లో మహిళ ఓ వ్యక్తిని బలంగా చెప్పుతో కొట్టడం చూడ‌వ‌చ్చు. దీంతో ఆ వ్యక్తి మహిళ ముఖంపై కొట్టి కిందపడేలా చేశాడు. చుట్టుపక్కల వారు వారిని వేరు చేసేందుకు ప్రయత్నించారు. ఓ యువ‌కుడు, ఓ మధ్య వ‌య‌స్కుడు కూడా ఒకరితో ఒకరు పోట్లాడుకోవడం చూడ‌వ‌చ్చు. ఇరుగుపొరుగు వారు వారిని దూరం చేసి పరిస్థితిని అదుపు చేశారు. అయితే ఈ వివాదం వెనుక కారణాలు తెలియరాలేదు.
ఢిల్లీ, ముంబై మధ్య జరిగిన మ్యాచ్‌లో జస్ప్రీత్ బుమ్రా, కరుణ్ నాయర్ మధ్య వాగ్వాదం జరిగింది. కరుణ్ నాయర్ జస్ప్రీత్ బుమ్రా రెండు ఓవర్లలో భారీగా పరుగులు రాబ‌ట్టాడు. నాయర్ సింగిల్ తీస్తూ బుమ్రాను తాకాడు. ఇక్కడి నుంచి ఇద్దరి మధ్య మాటల యుద్ధం మొదలై మ్యాచ్ ముగిసినా చర్చనీయాంశంగా మారింది.
ముందుగా బ్యాటింగ్ చేసిన ముంబై ఇండియన్స్.. నిర్ణీత 20 ఓవర్లలో ఐదు వికెట్లు కోల్పోయి 205 పరుగులు చేసింది. అనంతరం ఢిల్లీ క్యాపిటల్స్ జట్టు 19 ఓవర్లలో 193 పరుగులకు ఆలౌటైంది. ఈ మ్యాచ్‌లో ముంబై ఇండియన్స్ 12 పరుగుల తేడాతో విజయం సాధించింది. ఐపీఎల్‌లో ఢిల్లీ క్యాపిటల్స్‌కు ఇదే తొలి ఓటమి. వరుసగా నాలుగు మ్యాచ్‌లు గెలిచిన తర్వాత.. అక్షర్ పటేల్ నేతృత్వంలోని ఢిల్లీని ముంబై ఓడించింది.
6 మ్యాచ్‌ల్లో ముంబై ఇండియన్స్‌కు ఇది రెండో విజయం. పాయింట్ల పట్టికలో ఏడో స్థానానికి చేరుకుంది. అదే సమయంలో ఢిల్లీ క్యాపిటల్స్ జట్టు ఐదు మ్యాచ్‌లలో 4 విజయాలు, ఒక ఓటమితో పాయింట్ల పట్టికలో రెండవ స్థానంలో ఉంది.
